Íslenskubrú

Brautarlýsing

Námsbrautin er ætluð nemendum af erlendum uppruna með litla sem enga þekkingu á íslensku. Nemendur með annað móðurmál en íslensku hafa ólíkan bakgrunn hvað varðar nám, menningu og tungumál. Þeir hafa mismikla undirstöðu í eigin tungumáli, læsi og námi og eru því misjafnlega undirbúnir að takast á við nýtt tungumál í nýju umhverfi. Þeir hafa einnig verið mislengi á Íslandi og fengið ólík tækifæri til að kynnast íslenskri tungu. Saman fara markmið þar sem leitast er við að þjálfa nemendur í íslensku máli, sem og menningarfærni, og með því stuðla að félagslegri vellíðan nemandans. Þau fela í sér að nýja tungumálið sé lykill að íslensku samfélagi, skólastarfi, atvinnuumhverfi og brúi ólíka menningarheima. Með námi á brautinni er stefnt að því að nemendur verði sem best í stakk búnir til að taka virkan þátt í íslensku, lýðræðislegu þjóðfélagi.

Inntökuskilyrði

Námsbrautin er opin þeim nemendum af erlendum uppruna sem hafa litla sem enga kunnáttu í íslensku og náð hafa framhaldsskólaaldri. 

Námið

Brautin veitir ekki eiginleg réttindi, en með námi á brautinni er nemendum gert kleift að auka möguleika sína til náms og starfa í íslensku samfélagi. Eitt af lokamarkmiðum námsins er að opna möguleika nemenda á frekara námi við íslenska framhaldsskóla.

Námið á brautinni skiptist í fjórar annir og er megináherslan á íslenskukennslu á 1. og 2. þrepi (A1 – B2 skv. evrópska tungumálarammanum). Nemendum er raðað í íslenskuáfanga í samræmi við getu, þannig geta sumir nemendur sleppt námi í 1. þreps áföngum og sest beint í 2. þreps áfanga.  Að námi loknu útskrifast nemendur með 92 einingar og geta í framhaldinu sótt um annað nám á framhaldsskólastigi.

Kennsluaðferðir brautarinnar eru fjölbreyttar, byggja m.a. á leiðsagnarmati, og miðast við að allir nemendur eigi kost á að nýta hæfileika sína og fá endurgjöf á verkefni sín. Lögð er áhersla á sjálfstæð vinnubrögð og vinnusemi nemenda. Námssamfélagið gengur út á samvinnu kennara og nemenda sem skapar jákvætt og uppbyggilegt umhverfi til náms og starfa. 

Hæfniviðmið:

Að loknu námi skal nemandi hafa hæfni til að ...

• geta hlustað á talað mál og skilið merkingu þess.
• geta tjáð sig á viðeigandi hátt um ólík efni bæði munnlega og skriflega.
• hafa trú á eigin málakunnáttu.
• geta tekið þátt í samræðum um almenn málefni og notað viðeigandi málfar og hljóðfall.
• búa yfir fjölbreyttum orðaforða daglegs lífs.
• geta lesið texta á íslensku, sér til fróðleiks og ánægju.
• hafa skilning á málkerfi og eiginleikum íslensku.
• gera sér grein fyrir hvernig kunnátta í íslensku er lykill að margvíslegum samskiptum.
• að stunda nám í íslenskum framhaldsskóla.

Annarplan