Um VMA
Hlutverk skólans skv. 2. gr. laga um framhaldsskóla nr. 92/2008:
Hlutverk framhaldsskóla er að stuðla að alhliða þroska allra nemenda og virkri þátttöku þeirra í lýðræðisþjóðfélagi með því að bjóða hverjum nemanda nám við hæfi. Framhaldsskólar búa nemendur undir þátttöku í atvinnulífinu og frekara nám. Þeir skulu leitast við að efla færni nemenda í íslensku máli, bæði töluðu og rituðu, efla siðferðisvitund, ábyrgðarkennd, víðsýni, frumkvæði, sjálfstraust og umburðarlyndi nemenda. Þjálfa þá í öguðum og sjálfstæðum vinnubrögðum, jafnrétti og gagnrýninni hugsun. Kenna þeim að njóta menningarlegra verðmæta og hvetja til þekkingarleitar. Framhaldsskólar sinna miðlun þekkingar og þjálfun nemenda þannig að þeir öðlist færni til að gegna sérhæfðum störfum og hafi forsendur til að sækja sér frekari menntun.
Hlutverk skólans í menntun, uppeldi og námi nemenda er að:
- bjóða nemendum námsleiðir við hæfi
- skapa nemendum jákvætt og uppbyggilegt umhverfi til menntunar, uppeldis, náms og leiks
- búa nemendur undir framhaldsnám og sérhæfð störf
- búa nemendur undir þátttöku í samfélaginu
Hlutverk skólans í nærsamfélaginu og/eða samfélaginu almennt er að:
- stuðla að eflingu atvinnulífs með því bjóða fjölbreyttar námsleiðir í starfs- og iðnnámi og góðan undirbúning undir almenn og sérhæfð störf
- bjóða íbúum upp á fjölbreyttar námsleiðir
- stuðla að eflingu háskólastigsins með því að búa nemendur vel undir frekara nám
- stuðla með starfsemi sinni að hærra menntunarstigi samfélagsins
- tryggja með starfsemi sinni grunnþjónustu við íbúana og treysta þannig búsetuskilyrði og undirstöður velferðar í nærsamfélaginu
Nemendur eru hornsteinn Verkmenntaskólans. Það að þeir þroskist, öðlist sjálfstraust, líði vel, tilheyri hópnum og tileinki sér ákveðna leikni, þekkingu og hæfni skiptir mestu máli. Til að koma til móts við ólíkar þarfir nemenda býður Verkmenntaskólinn uppá fjölbreyttar námsleiðir, góða þjónustu og mikinn stuðning við nemendur. Gildi skólastarfsins og einkunarorð skólans eru:
Fagmennska - Fjölbreytni - Virðing.
Fagmennska felur í sér:
- ábyrgð og traust
- að verk séu unnin heiðarlega og vinnubrögð séu gagnsæ
- að vinnubrögð einkennist af vandvirkni og að þau séu útfærð af sérstakri færni
- að vinnubrögð séu fumlaus og að markvisst sé unnið að útfærslu hvers verkefnis
- að sá sem tekur að sér verkefni sýni alúð í því hvernig hann sinnir því.
Fjölbreytni felur í sér:
- að nemendur fái fjölbreytt viðfangsefni
- að kennsluhættir, námsframboð og námsmat sé fjölbreytilegt – og mæti væntingum, hæfileikum, áhuga og þörfum
- fjölbreyttan nemendahóp hvað varðar aldur, búsetu, námslega stöðu og fjölskyldustöðu
- fjölbreyttan hóp starfsmanna með mismunandi reynslu og menntun.
Virðing felur í sér að:
- allt starf einkennist af gagnkvæmri virðingu, umhyggju, umburðarlyndi og jafnrétti
- allir eigi jafna möguleika til þátttöku og áhrifa án tillits til félags- og efnahagslegrar stöðu, hæfni, reynslu, aldurs, kyns, kynhneigðar, trúarafstöðu, kynþáttar eða þjóðernis
- leysa ágreining og geta sett sig í spor annarra
- fara að almennum skóla- og umgengisreglum
Skólabragur
Í aðalnámskrá framhaldsskóla eru settir fram sex grunnþættir sem skulu endurspeglast í starfsháttum skóla, samskiptum og skólabrag. Þessir sex grunnþættir eru læsi, sjálfbærni, heilbrigði og velferð, lýðræði og mannréttindi, jafnrétti og sköpun.
Gildi skólans eru fagmennska, fjölbreytni og virðing og þau ásamt grunnþáttunum fléttast inn í allt skólastarfið og endurspegla skólabrag VMA.
Starf VMA einkennist af gagnkvæmri virðingu, umhyggju, umburðarlyndi og jafnrétti. Allir eiga jafna möguleika til þátttöku og áhrifa í skólastarfinu án tillits til félags- og efnahagslegrar stöðu, hæfni, reynslu, aldurs, kyns, kynhneigðar, trúarafstöðu, kynþáttar eða þjóðernis.
Lögð er áhersla á að rækta það besta í nemendum, glæða áhuga nemenda á náminu og efla sjálfstæði þeirra, sjálfstraust, félagsþroska og samskiptahæfni. Nemendur eru hvattir til virkni og þátttöku í skólastarfinu og fá tækifæri til að móta skólastarfið og hafa áhrif á nám sitt.
Námsleiðir eru fjölbreyttar og koma til móts við væntingar, hæfileika, áhuga og þarfir fjölbreytts nemendahóps og atvinnulífs á svæðinu. Í gegnum námið læra nemendur að tileinka sér víðsýni, gagnrýna hugsun, samkennd og frumkvæði.
Lögð er áhersla á að náms- og starfsumhverfi sé aðlaðandi og áhugavekjandi og að starfsfólk skólans sinni starfi sínu af fagmennsku og kennarar búi yfir fagþekkingu.
Kennsluhættir eru fjölbreyttir og námsmat í samræmi við það.