Listnáms-og hönnunarbraut *

Brautarlýsing

Nám á listnáms- og hönnunarbraut tekur að jafnaði þrjú ár og stunda nemendur verklegt og fagbóklegt nám á sviði sjónlista samhliða bóklegu námi til stúdentsprófs. Námið er undirbúningur fyrir frekar nám í háskólum eða sérskólum í skapandi greinum innan sjónlista, hvort sem um er að ræða tvívíða eða þrívíða sköpun, ljós- eða kvikmyndun, hagnýtar listir, stafrænt umhverfi eða fræðastörf. Á fyrsta ári kynnast nemendur grunnþáttum sjónlista. Á öðru velja þau áherslulínu, annað hvort myndlistar- eða fata- og textíllínu. Á lokaári dýpka nemendur þekkingu sína enn frekar og vinna lokaverkefni sem sýnt er á opinberum vettvangi. 

Inntökuskilyrði

Inntökuskilyrði á brautina eru að nemendur hafi lokið kjarnagreinum grunnskóla með fullnægjandi árangri. Námsárangur í kjarnagreinum mun einnig hafa áhrif á inn á hvaða þrep nemandinn innritast. Ef fleiri sækja um nám á brautinni en skólinn getur tekið við getur inntökuviðmið orðið hærra en lágmarkið.

Nánari upplýsingar um inntökuskilyrði er hægt að nálgast hér.

Námið

Á listnáms- og hönnunarbraut ganga nemendur inn á námsvettvang þar sem sérstök áhersla er lögð á að efla sköpun, sjónskyn, ímyndunarafl, tæknilega færni og gagnrýna hugsun.  

Þau efla þekkingu sína og skilning á grunnþáttum sjónlista en jafnframt á listum, hönnun og menningu í nútíð og fortíð. Þau efla tæknilega færni með verklegri vinnu í margskonar sjónmiðla. Á fyrsta ári fara þau í gegnum ákveðna grunnþætti svo sem í teikningu og lita- og fromfræði en á öðru og þriðja ári vinna þau með efni og aðferðir þess áherslusviðs sem þau hafa valið.  

Nemendur efla sig stöðugt í sköpun. Þau fá næði og frelsi til að læra í gegnum eigin reynslu af því að þróa hugmyndir sínar með rannsóknar- og tilraunavinnu og setja fram í miðil. Engin leið er þar sjálfgefin og ferlið mikilvægari en afraksturinn. Í allri vinnu sinni eiga nemendur í stöðugu samtali við kennara og samnemendur um eigin verk og vinnuferli þar sem þau leitast við að skilja og bæta eigin árangur. Smám saman taka nemendur meiri ábyrgð á náminu  og ljúka því með uppsetningu sýningar á lokaverkefnum sínum sem þau vinna sjálfstætt í þann miðil sem þau kjósa. 

Annarplan

Nemendur velja sér 30 eininga sérsvið, myndlist (gult) eða textílgreinar (bleikt), á 3.-5. önn. Athugið að þetta hefur einnig áhrif á óbundið val nemenda (3. og 4. önn).

*birt með fyrirvara um breytingar