HÖTE3VE05 - Vefnaður

Lýsing

Nemandinn kynnist menningarlegu gildi vefnaðar fyrr og nú. Hann þjálfast í notkun myndvefnaðarramma og mismunandi gerða vefstóla og vinnur prufur og misstór vefstykki. Nemandinn eykur þekkingu sína á frumbindingunum þremur og lærir hvernig uppistaðan binst ívafinu á margbreytilegan hátt. Hann fær jafnframt góða innsýn í vinnuferli vefnaðar, bindifræði og útreikninga sem henni tengjast. Þá lærir hann að nýta bækur, tímarit og forrit sér til stuðnings við hönnun fyrir vefnað og kynnist verkum listamanna og hönnuða sem vinna með miðilinn.

Þekkingarviðmið:
Nemandi skal hafa öðlast þekkingu og skilning á:

• Hvernig hlutverk vefnaðar hefur breyst og þróast í gegnum tíðina

• Grunnhugtökum sem tengjast vefnaði, vefstólum, vefnaðartækni, bindifræði, útreikningum og notkun bindifræðiforrita.

• Muninum á milli frumbindinganna þriggja og muninum á band-, þráðar og jafnþráða áferð

• Vinnuferlinu sem þarf að fylgja við uppsetningu á vef og í vefnað til þess að þráður geti orðið að voð

Leikniviðmið:
Nemandi skal hafa öðlast leikni í að:

• Vinna nauðsynlega útreikninga fyrir vefnað og búa til bindifræðimunstur með aðstoð bindifræðiforrits

• Setja upp vef í myndvefnaðarramma og ólíkar gerðir vefstóla

• Vefa í ramma og vefstól með ólíkum efnum og aðferðum

• Vinna eftir ferli, þar sem eitt vinnslustig tekur við af öðru, að loka niðurstöðu

Hæfniviðmið:

Nemandi skal geta hagnýtt þá almennu þekkingu og leikni sem hann hefur aflað sér til að:

• Þróa eigin hugmyndir fyrir vefnað á sjálfstæðan hátt með rannsóknar- og skissuvinnu

• Velja efni og aðferðir í tengslum við eigin hugmyndir og geta rökstutt ákvarðanir með tilliti til faglegrar þekkingar og notagildis

• Nýta grunnþætti bindifræðinnar til að búa til ný munstur til samræmis við eigin hugmyndir

• Ígrunda og ræða um verk sín og vinnuferli í samvinnu við kennara og samnemendur og setja eigin verk fram til kynningar með skýrum hætti