Í þjálfun fyrir flugmannsstarf hjá Icelandair
Það vakti verðskuldaða athygli vorið 2015 þegar Gunnar Ingi Láruson, þá sautján ára gamall, brautskráðist sem stúdent frá VMA eftir fjögurra anna nám. Hann braut blað í sögu skólans, aldrei áður hafði nemandi lokið stúdentsprófi á svo skömmum tíma. Og ekki nóg með það, Gunnar Ingi brautskráðist af þremur brautum; viðskipta- og hagfræðibraut, félagsfræði- og náttúrufræðibraut. Í viðtali hér á heimasíðunni fyrir tæpum þremur árum kom fram að Gunnar Ingi hefði þá þegar lokið námi til bæði svifflugmanns- og einkaflugmannsréttinda og hann væri ákveðinn í því að fara strax haustið eftir í nám til atvinnuflugmannsréttinda enda hafi hann alltaf alið með sér þann draum að verða atvinnuflugmaður.
Núna þremur árum síðar er þessi æskudraumur Gunnars Inga að verða að veruleika. Hann er í markvissri undirbúningsþjálfun til þess að hefja störf sem flugmaður hjá Icelandair núna á vordögum.
Í flugnám haustið 2016
“Haustið 2015 fór ég til Keflavíkur og hóf bóklegt atvinnuflugmannsnám í Keili. Sumarið 2016 var ég á Akureyri og safnaði flugtímum. Um haustið fór ég síðan með tveimur félögum mínum úr flugnáminu til Ungverjalands til þess að ljúka verklega atvinnuflugmannsnáminu. Ýmsar ástæður voru fyrir þeirri ákvörðun. Í fyrsta lagi var þetta ódýrari kostur en taka verklega hlutann hér heima og í annan stað vissum við að það myndi taka styttri tíma þarna úti því veðrið væri hagstæðara til þess að fljúga. Ég hefði getað tekið verklega hlutann hér heima, upp á það er boðið í bæði Keflavík og Reykjavík, en á þessum tíma voru komnir biðlistar hér heima í námið og við sáum fram á að það myndi taka mun lengri tíma. Það var rétt ákvörðun að fara til Ungverjalands. Þetta var skemmtileg lífsreynsla og gaman að prófa að fljúga í nýju umhverfi. Við bjuggum í Budapest og keyrðum síðan í um fjörutíu mínútur út fyrir borgina í skólann. Við fórum út í októberbyrjun, komum heim um jólin og vorum síðan aftur í um tvær vikur í janúar 2017,” segir Gunnar Ingi.
Flugkennari á Akureyri
Eftir að Gunnar Ingi kom heim frá Ungverjalandi æxluðust mál þannig að hann settist á ný á skólabekk í Flugskóla Akureyrar og aflaði sér réttinda til flugkennara. “Ég hafði ekki hugleitt að taka þessi réttindi en ég sé alls ekki eftir því í dag. Í kjölfarið fór ég síðasta vor að kenna nemendum í einkaflugmannsnámi í Flugskóla Akureyrar og hef gert það meira og minna síðan. Það var mikið að gera í verklegu kennslunni síðastliðið sumar því veturinn 2016-2017 var metfjöldi í bóklega náminu, um tuttugu nemendur,” segir Gunnar Ingi.
Eftir að hafa lokið verklega hluta atvinnuflugmannsréttindanna í Ungverjalandi sótti Gunnar Ingi um sumarstarf hjá Icelandair. Hann gerði sér hins vegar ekki vonir um að fá starf sl. sumar enda fyrirvarinn skammur. En í ágústbyrjun í fyrra fékk hann jákvætt svar frá Icelandair um starf sem flugmaður hjá félaginu á komandi sumri. Hann segir að þetta hafi óneitanlega verið mikil gleðitíðindi og hann hafi verið í töluverðan tíma að melta þau. Gamli draumurinn um að verða atvinnuflugmaður var að verða að veruleika.
Flugmaður hjá Icelandair
“Í nóvember í fyrra fór ég suður og byrjaði í þjálfun á vélar Icelandair, tók annars vegar bóklegt nám og hins vegar verklegt nám í hermi. Þessu lauk ég rétt fyrir jól. Fór síðan aftur norður og hef kennt í byrjun þessa árs þegar veður hefur leyft. Er hins vegar núna aftur kominn suður í frekari þjálfun fyrir sumarið. Stærsti hluti verklegu þjálfunarinnar á þessar stóru vélar er í hermi, núna hef ég lokið ellefu lotum, fjórum tímum í senn, í herminum. Einnig höfum við tekið nokkrar lendingaræfingar á vél í Keflavík. Ég er því nú þegar búinn að prófa að sitja frammi í flugstjórnarklefanum og það er sannast sagna ótrúlegt hversu lítill munur er á því og vera í hermi,” segir Gunnar Ingi.
Hann segir dýrmætt að hafa auk atvinnuflugmannsréttindanna í handraðanum réttindi til þess að kenna flug. Ekki sé á vísan að róa í atvinnufluginu og því sé gott að geta nýtt mögulegt uppihald í því til kennslu. “Þegar ég horfi til baka er ég mjög sáttur að hafa farið þessa leið,” segir Gunnar Ingi sem er tvítugur að aldri og því alveg örugglega með yngstu atvinnuflugmönnum á Íslandi til þess að fljúga farþegaþotum.
Góður grunnur úr VMA
“Ég tel mig hafa fengið góðan grunn í náminu í VMA. Góð undirstöðuþekking í stærðfræði er kostur í flugnámi en það er samt engin ástæða til þess að láta hana hræða fólk frá því að fara í þetta nám. Grunnur í eðlisfræði kemur sér líka vel. Sjálfur tók ég raunar ekki mikla eðlisfræði í VMA og það hefur ekki komið að sök.
Hér á árum áður voru margir sem útilokuðu flugnám vegna þess að þeir töldu sig ekki hafa nægilega góðan grunn fyrir það. Þetta hefur breyst og nú sækja mun fleiri í þetta nám en áður, sem er bara jákvætt. Ég vil hvetja þá sem hafa í huga að fara í einkaflugmannsnám að setja sig í samband við flugskóla og það er ekki vitlaust að fara í prufuflug. Þeir sem fá flugbakteríuna á annað borð, fá hana oftast strax í prufufluginu. En eitt ber að hafa í huga, flugnám kostar umtalsverða fjármuni,” segir Gunnar Ingi Láruson.