Sýndu listsköpun Helenu Óskar og Símonar
Síðastliðinn föstudag var efnt til áhugaverðrar listsýningar á starfsbraut VMA þar sem tveir nemendur sýndu afrakstur vinnu sinnar á önninni – annars vegar Akureyringurinn Helena Ósk Jónsdóttir og hins vegar Dalvíkingurinn Símon Gestsson.
Á starfsbraut VMA er unnið á margvíslegan hátt með listsköpun og hæfileikar hvers og eins einstaklings virkjaðir. Það á svo sannarlega við um listsköpun Helenu og Símonar sem unnu með kennurunum Margréti Bergmann Tómasdóttur og Örnu Valsdóttur núna á vorönn og einnig hafa umsjónarkennarar nemendanna, Anna Jóhannesdóttir og Inga Dís Árnadóttir, og stuðningsfulltrúarnir Áslaug Kristjánsdóttir og Steinunn Jóna Sævaldsdóttir lagt hönd á plóg.
Helena Ósk, sem er fædd 1999, tókst á við myndsköpun af ýmsum toga og sýndi afrakstur vinnu sinnar á sýningunni. Hestar hafa verið henni lengi hugleiknir og hún hefur sérstaka ánægju af því að teikna þá. Ekki minnkaði áhugi Helenu á hestum í vetur þegar hún kynntist þeim og hestamennsku betur í gefandi samstarfi við stuðningsfulltrúana Áslaugu og Steinunni Jónu. Á sýningunni sl. föstudag mátti glögglega sjá þennan hestaáhuga Helenu.
Símon, sem er fæddur 2001, hefur mikinn áhuga á umhverfishljóðum og að taka upp myndbrot á iPadinn sinn og vinna með myndbönd. Þennan áhuga virkjaði Arna Valsdóttir og vann með honum skemmtileg myndbönd sem mátti sjá brot af á sýningunni. Símon vann einnig myndlistarverk fyrir sýninguna.
Almennt má segja um listsköpun Helenu Óskar og Símonar að þau hafa bæði sterka sýn á hvað þau vilja koma á framfæri og verk þeirra bera þess vitni.
Hér er myndband sem sýnir verk Helenu og Símonar á sýningunni í VMA sl. föstudag.