Norður Rækja áhugaverðasta nýsköpunin
Norður Rækja, eitt þriggja fyrirtækja sem nemendur í frumvöðlafræðiáfanga hjá Írísi Ragnarsdóttur kennara kynntu á vörumessu í Smáralind, var útnefnd Áhugaverðasta nýsköpun ungra frumkvöðla á árinu 2026.
Eins og greint var frá hér á heimasíðunni kynntu nemendur í áfanganum þrjú verkefni sín – Norður Rækju, borðspilið EKKI GOOGLA og Vex lýðheilsuarmband - á vörumessu ungra frumkvöðla í Smáralind 18. og 19. apríl sl. Þar voru kynntar um hundrað og fimmtíu hugmyndir eða fyrirtæki frá yfir sex hundruð framhaldsskólanemum í sautján framhaldsskólum um allt land. Í kjölfarið var hringurinn þrengdur og valin 40 fyrirtæki í úrslit í endanlegri leit að bestu hugmyndunum. Sérstaklega ánægjulegt var að öll þrjú fyrirtæki nemendanna í VMA voru valin áfram, sem segir ýmislegt um hversu góðar hugmyndirnar eru og þá vinnu sem nemendur hafa lagt í þær á síðustu vikum og mánuðum. Nemendur fengu að vita föstudaginn 24. apríl að hugmyndir þeirra hefðu verið valdar áfram í Fyrirtækjasmiðju ungra frumkvöðla - JA Iceland og jafnframt að á mánudegi og þriðjudegi í síðustu viku, 27. og 28. apríl, þyrftu þeir að vera klárir í viðtöl við dómara í Arionbanka í Reykjavík og vera síðan með með þriggja mínútna kynningar á hugmyndum sínum. Það þurfti því að vinna hratt og örugglega. Auðvitað var undir niðri svolítið stress í nemendum að kynna hugmyndir sínar með þessum hætti en kynningarnar gengu ljómandi vel og eiga nemendur mikið hrós skilið fyrir þær.
Sem fyrr segir var eitt þessa þriggja fyrirtækja, Norður Rækja, útnefnt Áhugaverðasta nýsköpunin og fengu nemendur sem að verkefninu komu fallegan verðlaunagrip að launum (sjá meðf. mynd). Agnar Óli Grétarsson, einn nemendanna sem standa að Norður Rækju, segir að það hafi komið sér skemmtilega á óvart að hugmynd þeirra skyldi verða útnefnd sem Áhugaverðasta nýsköpunin, enda hafi margar aðrar flottar hugmyndir verið í pottinum. Mögulega hafi haft sitt að segja um þessa niðurstöðu dómaranna að frostþurrkun sé lítt þekkt aðferð hér á landi og því óvenjulegt að beita henni við framleiðslu á snakki, eins og gert er í þessu tilviki. Um er að ræða frostþurrkaða rækju sem snakk. Agnar Óli segir það rétt til getið að hann hafi upphaflega verið hugmyndasmiðurinn, hugmyndin hafi komið til hans þegar hann lá heima veikur og gat ekki mætt í fyrstu tvo tímana í áfanganum. Tilviljun ein hafi í raun ráðið því að frostþurrkuð rækja hafi orðið niðurstaðan. Hann segir að þegar upp er staðið hafi þetta verið áhugavert og skemmtilegt ferli og hann og samnemendur hans í áfanganum hafi lært fjölmargt, ekki síst er varði markaðsmálin og hversu mikilvægt það sé að byggja upp gott tengslanet.
Annað verkefni VMA-nema sem komst í 40 fyrirtækja úrslitin heitir EKKI G0OGLA (fyrirtækið að baki því heitir Kamanote) og er skemmtilegt og vel upp byggt borðspil. Einn nemandanna að baki þeirri hugmynd er Heimir Sigurpáll Árnason. „Þetta var mjög gaman og mikil upplifun og fer alveg klárlega í reynslupokann. Það var til dæmis mjög skemmtileg reynsla að koma fram og kynna hugmyndina. Og ekki síst var gaman að sjá hugmynd sem kviknaði í skólastofunni í VMA verða að stóru og burðugu verkefni. Fyrir mig var þetta mjög lærdómsríkt, ekki síst hversu mikilvægt það er að mórallinn sé góður og jákvæður og hugur fylgi máli. Staðreyndin er sú að ef viljinn er ekki til staðar gerist ekkert. Það er því mjög mikilvægt að fylgja hugmyndum vel eftir, að ástríðan sé til staðar. Við hefðum alveg getað valið að fara í þetta með hálfum huga en ef svo hefði verið hefðum við aldrei náð svona langt með verkefnið. Við trúðum á hugmyndina og við gerum það enn þann dag í dag. Við seldum um tuttugu spil á vörumessunni í Smáralind og núna eru um þrjátíu spil frátekin og bíða afgreiðslu af okkar hálfu. Við erum sjálf að vinna að því að framleiða spilin og þegar þau verða tilbúin getum við afgreitt pantanir. Ég útiloka ekki að hugmyndin verði unnin áfram, ég tel að hún hafi alla burði til þess. Við eigum bara eftir að taka endanlega afstöðu til þess,“ segir Heimir.
Þriðja verkefnið sem nemendur í frumkvöðlaáfanganum unnu og tefldu fram heitir Vex lýðheilsuarmband sem leggur áherslu á andlega heilsu, ekki síst ungs fólks. Hlynur Blær Tryggvason, einn af nemendunum að baki Vex, segir að hugmyndavinnan og útfærsla hugmyndarinnar hafi verið mikil og góð reynsla. Það sem hann taki ekki síst út úr þessu verkefni sé að allt í ferlinu skipti máli og það hafi verið gott að kynnast bæði hæðum og lægðum á leiðinni. Í upphafi hafi hugmyndin verið mun víðtækari en hún hafi síðan verið í útfærslu, það hafi komið í ljós að betra væri að ofhugsa hlutina ekki en einblína frekar á það augljósa og einfalda. Það hafi gefist vel þegar upp var staðið. Hlynur segir að hann hafi verið mjög sáttur við að komast svona langt með Vex og þegar á heildina sé litið hafi áfanginn skilað miklu og verið mikilvægur í reynslubankann.
Hér má sjá upplýsingar um alla verðlaunahafa í Fyrirtækjasmiðju ungra frumkvöðla - JA Iceland árið 2026.