Áhuginn er lykilatriði
Nú stundar tugur nemenda nám í bifvélavirkjun í VMA. Til þess að innritast í námið þurfa nemendur að hafa áður tekið grunndeild málm- og véltæknigreina, sem er tvær annir. Nemendahópurinn sem nú stundar nám í bifvélavirkjun lýkur því í vor – þ.e.a.s. náminu í skólanum – en auk þess ber nemendum eins og í öðrum iðngreinum að ljúka ákveðnum lágmarks tíma á verkstæði undir handleiðslu meistara.
Fyrir nokkrum árum var bifvélavirkjunin kennd í aðstöðu úti í bæ en síðustu annir hefur öll kennslan verið innan veggja skólans – bæði bókleg og verkleg. Þegar litið var inn í kennslurýmið í bifvélavirkjun voru nemendur undir stjórn Braga Finnbogasonar kennara og brautarstjóra bíliðngreina að mæla þjöppun í nokkrum bílum. Bílaverkstæðin á Akureyri hafa verið fús að leggja náminu lið með ýmsum hætti, m.a. með því að láta námsbrautinni í té bíla til þess að leyfa nemendum að spreyta sig á við hinar ýmsu viðgerðir og bilanagreiningar.
Einn þeirra nemenda sem stunda nú nám í bifvélavirkjun í VMA er Akureyringurinn Daníel Ingi Kristinsson. Að loknu grunnnámi málm- og véltæknigreina fór hann í vélstjórn en færði sig yfir í bifvélavirkjunina og kann vel við hana. „Ég hef mikinn áhuga á vélum og hef lengi haft. Í gegnum tíðina hef ég átt nokkur mótorhjól,“ segir Daníel Ingi og bætir við að hann telji algjört lykilatriði fyrir þá sem fara í bifvélavirkjun að hafa brennandi áhuga á viðfangsefninu. „Síðustu tvö sumur hef ég starfað á bifreiðaverkstæðum hér á Akureyri – Car-X og Baugsbót – og eins og staðan er núna sé ég fyrir mér að starfa í framtíðinni sem bifvélavirki. Hins vegar kemur til greina að mennta sig frekar, bifvélavirkjun er til dæmis mjög góður grunnur fyrir þá sem vilja læra flugvirkjun,“ segir Daníel Ingi.