Kom aldrei annað til greina en listnám
Listnáms- og hönnunarbrautin í VMA hefur jafnan verið vinsæl og svo er einnig nú. Eins og segir í lýsingu á brautinni hér á heimasíðu skólans er með námi á þessari braut „ ... lagður grunnur að listiðkun og frekara námi í listgreinum í sérskólum eða í skólum á háskólastigi. Menntun á listnáms- og hönnunarbraut stuðlar að eflingu sköpunargáfu sem gefur góðan grunn fyrir nám í öllum skapandi greinum sem tengjast manngerðu umhverfi, skemmtana-, tölvu-, tísku- og listheimi.“
Námi á listnáms- og hönnunarbraut lýkur með stúdentsprófi. Námstími er 3 – 4 ár og ætli nemandi að ljúka námi á 3 árum þarf hann að ljúka 67 einingum á ári að jafnaði.
Námið er á tveimur línum – annars vegar myndlistarlínu og hins vegar textíllínu.
Ragna Margrét Sigþórsdóttir og Sigrún Nattída Guðmundsdóttir, báðar frá Akureyri, eru á myndlistarlínu listnáms- og hönnunarbrautar. Þær rifja upp að í raun hafi ekki komið annað til greina hjá þeim á sínum tíma þegar þær luku grunnskóla en að fara í listnám í VMA. „Ég hef alltaf verið að teikna og því kom einhvern veginn ekkert annað til greina en að fara þessa leið,“ segir Ragna Magrét og bætir við: „Mér finnst gaman að búa til karaktera og dýr, t.d. að blanda tveimur, þremur ólíkum dýrum saman í eitt.“
„Það lá beint við að fara í myndlist því ég hef lengi haft áhuga á grafískri vinnslu, tæknibrellum og í það nýtist myndlistargrunnur vel. Ég vonast til að geta unnið á þessu sviði í framtíðinni,“ segir Sigrún Nattida.