Á Erasmus styrk í Ansouis
Baldur Smári Sævarsson, matreiðslunemi, starfaði á liðnu sumri um nokkurra vikna skeið á veitingastað í Suður-Frakklandi. Hann naut styrks frá Erasmus+ sem greiddi ferða- og dvalarkostnaðinn.
„Ég var í grunndeild matvælabrautar í VMA veturinn 2015/2016. Ég hafði lagt frænda mínum lið í veisluþjónustu og var farinn að elda aðeins heima, það kom einhvern veginn ekkert annað til greina en að fara á matvælabrautina. Matvælagreinarnar vöktu áhuga minn og það kom ýmislegt til greina í þeim efnum en fljótlega ákvað ég að halda áfram í matreiðslu og fékk samning hjá Icelandair hóteli á Akureyri strax að grunnnáminu loknu í maí 2016. Þar var ég í hálft annað ár en fór síðan á Icelandair hótel í Mývatnssveit og tók jafnframt annan bekk í matreiðslu í VMA á vorönn 2018. Í kjölfarið fékk ég vilyrði um Erasmus styrk til þess að fara út og víkka út sjóndeildarhringinn í matreiðslunni. Ég hafði eitt ár til þess að nýta mér styrkinn og úr varð að ég fór til Frakklands og vann þar á veitingastað í um sex vikur í sumar, frá 4. júní til 16. júlí. Veitingastaðurinn er í litlum bæ sem heitir Ansouis í Suður-Frakklandi, þar sem er m.a. um þúsund ára gamall kastali. Þetta er ekki þekktur ferðamannastaður en Frakkar þekkja hann og sækja heim. Mikill meirihluti gesta á veitingastaðnum, sem er með Michelin-stjörnu, eru Frakkar,” segir Baldur Smári.
Hann segir dvölina í Frakklandi hafa verið afar skemmtilega og lærdómsríka og hann er þakklátur fyrir að hafa átt þess kost að fara út og kynnast nýju fólki og nýjum hlutum. „Ég vann þarna með allskyns hráefni, t.d. grænmeti sem ég er ekki vanur að vinna með og allskyns fisk sem við höfum ekki hér. Eigandi veitingastaðarins lagði mikla áherslu á að hafa allt hráefni ferskt og úr héraðinu.“
Baldur Smári segir að Olivier Alemany, sem á veitingastaðinn ásamt eiginkonu sinni, Delphine, hafi kvatt sig með þeim orðum að hann væri fús til að gefa honum góð meðmæli og greiða götu hans eins og hann gæti ef hann hefði áhuga á að starfa síðar í Frakklandi. „Ég hef mikinn áhuga á því að fara út næsta sumar og vinna á veitingastað og sjá mig frekar um. Vonandi verður hægt að bjóða upp á þriðja bekkinn í matreiðslu í VMA á vorönn, ég mun sækja um hann. Ef ekki fer ég suður og tek þriðja bekkinn þar. Ég ætla mér að ljúka þriða bekknum og sveinsprófinu næsta vor, því ég er nú þegar búinn með áskilinn námssamningstíma. Að loknum þriðja bekknum hef ég áhuga á að starfa utan landsteinanna tímabundið og afla mér reynslu og síðan í framhaldinu að ljúka meistararéttindum. Ég er nú þegar búinn að taka nokkra áfanga í meistaranáminu en ég get ekki lokið því fyrr en ég hef lokið sveinsprófi,“ segir Baldur en hann starfar nú á veitingastaðnum Sölku á Húsavík og verður þar fram að áramótum.
Eftir að hafa lokið grunndeildinni í VMA hélt hann áfram viðbótarnámi til stúdentsprófs, tók áfanga í fjarnámi í VMA og lauk stúdentsprófi frá Framhaldsskólanum á Húsavík sl. vor.
„Ég held að fjölbreytnin í starfinu sé það sem heillar mig. Þetta býður upp á þann möguleika að starfa líka erlendis og kynnast einhverju nýju. Þetta getur auðvitað verið stressandi starf en ef vinnuandinn er góður og starfsumhverfið gott er þetta mjög skemmtilegt. Það þarf að vera stuð í vinnunni,“ segir Baldur Smári.
Aftur að dvölinni í Frakklandi á liðnu sumri. Baldur Smári segir að þetta hafi verið enn meira ævintýri en hann hafi fyrirfram búist við. „Þetta er auðvitað Michelin staður og því eru gerðar miklar kröfur til matreiðslunnar og þess að staðurinn líti vel út. Þarna var þrifið tvisvar sinnum á dag og mér telst til að á þeim sex vikum sem ég dvaldi úti hafi ég skúrað hundrað sinnum! En ég gerði vitaskuld ýmislegt annað, eins og til dæmis að elda. Mest var ég í forréttum og eftirréttum. Á þessum tíma var hitabylgja og var hitinn flesta daga hátt í fjörutíu stig. Það var vissulega erfitt að vinna í þessum hita. Frakkkarnir eru vanir þessu en þetta var eitthvað alveg nýtt fyrir mig. Á staðnum voru bara Frakkar að vinna. Kokkurinn talaði ágæta ensku en aðrir minna. Ég talaði ensku en náði ekki að læra mikið í frönsku,“ segir Baldur Smári. Hér má sjá myndir sem Baldur Smári tók í Ansouis og hér er veitingastaðurinn og Baldur með starfsfólkinu.