Sagnamaðurinn Hálfdán með nýja kilju
Hálfdán Örnólfsson kennari við VMA hefur nýverið sent frá sér kiljuna „Heilsurækt og mannamein“ sem hefur að geyma tvær frumsamdar sögur. Hér heldur Hálfdán áfram þar sem frá var horfið í fyrstu kilju sinni sem hann sendi frá sér fyrir sléttum tveimur árum og ber nafnið „Þrjár sögur“. Fyrst og fremst segir Hálfdán skriftirnar vera tómstundaiðju sem láti sig ekki svo auðveldlega í friði.
„Ég fer mikið í göngutúra og þá vellur gjarnan upp í manni vitleysan sem ég pikka svo inn í tölvuna þegar heim er komið. Þannig verða þessar sögur til. Ég hef lengi haft mikinn áhuga á sögum af fólki og landi frá fyrri tíð, því sem stundum er kallað þjóðlegur fróðleikur, og það má kannski segja að sumt af því sem ég geri sé nokkurs konar afbökun á þess konar ritverkum. Ég tek fyrir afskekkta eyðibyggð, nánar tiltekið Keflavík í Vestur- Ísafjarðarsýslu og spinn upp sögur af fólki og fénaði. Kannski er rétt að kalla þetta sagnfræðilega skrumskælingu eða þjóðlega þvælu. Það er auðvitað töluvert ábyrgðarleysi að láta svona lagað frá sér fara. Alla vega ef einhverjum dytti í hug að trúa einhverju af þessu.
Kiljan sem ég er að gefa út núna ber titilinn „Heilsurækt og mannamein“ og hún inniheldur tvær sögur. Þetta eru svona hálfstuttar sögur, 30-70 bls. Ég veit ekki hvað það heitir. Varla skáldsögur en ekki heldur smásögur. Þetta eru hálfgerðir bastarðar eða skoffín svona bókmenntalega séð.“
Pensilín og altæk gæðastjórnun
Hálfdán segir að önnur sagan heiti „Pensilín“ og eigi að gerast í Keflavík og þar um kring fyrir langa löngu. „Sú saga fellur undir þjóðlega þvælu og höfuðþemað er barátta fólks við sjúkdóma og ýmsar ókindur,“ segir Hálfdán. Hina söguna, “Altæk gæðastjórnun“, segir hann vera af allt öðrum toga. „Sú gerist í nútímanum og líklega má flokka hana sem hrollvekju þó að hún fjalli um fyrirbæri sem ætti auðvitað að vera öllum mjög hugnanlegt. Við hér í VMA þekkjum vel til gæðakerfa og ég veit að samstarfsfólk mitt, sem endist til að lesa bullið, mun kannast við alla vega nokkrar skammstafanir. Sagan fjallar samt alls ekki um VMA eða skólamál af nokkru tagi. Þarna er reynt að koma skikki á einstakling, sem er í vondum málum, með því að setja hann í meðferð eða þerapíu sem byggist á hugmyndafræði altækrar gæðastjórnunar.“
.... það var sagt mér
Sem fyrr segir gaf Hálfdán út kiljuna „Þrjár sögur“ „en hún var svona ámóta kombó og þessi úr þjóðlegri þvælu, hrollvekjum og þaðan af verra. Kiljan sem ég er að gefa út núna hefur það framyfir þá fyrri að hún er prófarkalesin. Við það skapast reyndar að mínu mati meiri fjarlægð á milli rithöfundar og lesanda, þar sem stafsetningar- og málvillur geta verið mikilvæg höfundareinkenni og hluti af stílnum, en það var sagt mér að það færi samt betur á því að prófarkalesa.“
Hálfdán segir kilju sína gefna út í frekar litlu upplagi og því selji hann hana sjálfur „undir borðið og hálfpartinn á laun eins og passar best fyrir bókmenntir af þessu tagi.“
Í ljósi þess að upplagið er lítið er engin ástæða til þess að geyma að tryggja sér eintak. Hér gildir hið forkveðna; fyrstur kemur, fyrstur fær! Senda má netpóst á Hálfdán – halfdan@vma.is eða hringja í hann í heimasímann 4627461.