Ritsmiðja Ungskálda í VMA nk. laugardag - skráningu lýkur í dag
Það er orðinn fastur liður að á þessum tíma árs fer af stað verkefnið Ungskáld sem eins og nafnið gefur til kynna vísar til ritlistar og skapandi hugsunar hjá ungu fólki. Sem fyrr stendur Ungskáld fyrir ritlistakeppni fyrir ungt fólk á aldrinum 16-25 ára þar sem veitt eru peningaverðlaun fyrir efstu þrjú sætin. Engar hömlur eru settar á texta, hvorki varðandi efnistök né lengd. Þeir þurfa þó að vera á íslensku.
Umsjón með verkefninu, sem er eina sinnar tegundar hér á landi, hafa Ungmennahúsið Rósenborg, Amtsbókasafnið á Akureyri, Akureyrarstofa,VMA og MA í góðri samvinnu við Framhaldsskólann á Húsavík, Háskólann á Akureyri, Minjasafnið á Akureyri og Menningarfélagið Hraun í Öxnadal. Verkefnið er styrkt af Uppbyggingarsjóði Norðurlands eystra.
Í tengslum við ritlistakeppnina verður efnt til ritlistasmiðju og verður hún í VMA nk. laugardag, 2. nóvember. Leiðbeinendur verða Stefán Máni rithöfundur og Bryndís Björgvinsdóttir rithöfundur og lektor við Listaháskóla Íslands. Skráningu í smiðjuna lýkur í dag, 31. október. Vert er að taka fram að ritlistasmiðjan er án endurgjalds fyrir þátttakendur og þeim ber ekki skylda til að skila inn textum í ritlistakeppnina.
Dagskrá ritlistasmiðjunnar á laugardaginn verður sem hér segir:
Kl. 09.00 - 09.10 Mæting í VMA
Kl. 09.10 - 12.00 Stefán Máni, smiðja og vinnustofa
Kl. 12.00 - 13.00 Hádegishlé, hádegismatur í boði Ungskálda
Kl. 13.00 - 16.00 Bryndís Björgvinsdóttir, smiðja og vinnustofa
Kl. 16.00 Ritlistasmiðju lýkur
Síðasti skiladagur á efni – ljóð, saga, leikrit o.s.frv. - í ritlistakeppni Ungskálda 2019 er 16. nóvember nk. Efninu skal skila á rafrænu formi í netfangið ungskald@akureyri.is ásamt upplýsingum um höfundinn. Nánari upplýsingar um samkeppnina eru veittar í sama netfangi. Einnig má fá frekari upplýsingar á heimasíðunni www.ungskald.is og á samfélagsmiðlunum facebook og instagram.
Sem fyrr segir verða peningaverðlaun veitt fyrir þrjú efstu sætin:
1. sæti fær 50.000 kr verðlaun
2. sæti fær 30.000 kr verðlaun
3. sæti fær 20.000 kr verðlaun
Einnig verða veitt bókaverðlaun.
Á síðasta ári var Anna Kristjana Helgadóttir, nemandi í VMA, Ungskáld 2018. Hún sendi fimm hugverk í samkeppnina og uppskar afar vel, ljóðið hennar „Án titils“ fékk fyrstu verðlaun og smásagan „Tækifærin“ fékk önnur verðlaun. Í þriðja sæti í keppninni í fyrra var smásagan „Dagur á veginum“ eftir Söndru Marín Kristínardóttur.
Hér er viðtal á N4 nýverið við Önnu Kristjönu og Aðalbjörgu Bragadóttur íslendkukennara í MA um Unglist 2019.