Nemendur á íþrótta- og lýðheilsubraut heimsóttu Oppdal og Fjerritslev
Tveir hópar nemenda af íþrótta- og lýðheilsubraut VMA heimsóttu í síðustu viku framhaldsskóla í Oppdal í Noregi og Fjerritslev í Danmörku. Heimsóknirnar voru liður í Erasmus verkefninu „Vin-Vin“ sem hefur það að markmiði bæta lýðheilsu með samstarfi lýðheilsu- og/eða íþróttabrauta framhaldsskólanna þriggja. Hluti af verkefninu felst í því að fara með nemendahópa milli landanna með það að markmiði að nemendur fái að kynnast mismnunandi aðstæðum til hreyfingar og iðkunar íþrótta. Áherslan í verkefninu í Oppdal og Fjerritslev er á útivist og útiveru en í VMA er þemað knattspyrna og er skólinn í samstarfi við Knattspyrnufélag Akureyrar í þeim efnum.
Síðastliðið vor komu nemendur frá Oppdal til Akureyrar og að ári liðnu munu nemendur frá Fjerritslev koma í heimsókn í VMA.
Í Fjerritslev voru með nemendum Ólafur H. Björnsson íþróttakennari og Ómar Kristinsson sviðsstjóri stúdentsprófsbrauta og í Oppdal voru með nemendum kennararnir Jóhann Gunnar Jóhannsson og Svanlaugur Jónasson.
Hér eru nokkrar myndir sem voru teknar í heimsókninni til Fjerritslev í Danmörku og hér á fb-síðu skólans eru fleiri myndir úr heimsókn VMA-nemendanna þangað. Og hér má sjá myndir sem voru teknar í heimsókn nemenda af íþrótta- og lýðheilsubraut VMA til Oppdal í Noregi.