Með skærin á lofti á Frisör Velde í Þrándheimi
Í sumar starfaði Magnea Elinóra Pjetursdóttir, nemandi á fimmtu önn í hársnyrtiiðn í VMA, í sex vikur á hársnyrtistofu í Þrándheimi í Noregi og var þessi starfstími hluti af vinnustaðanámi hennar í náminu í VMA. Eins og kom fram í frétt hér á heimasíðunni í gær þurfa nemendur að ljúka ákveðnum fjölda vikna í vinnustaðanámi áður en til útskriftar kemur. Magnea Elinóra er ein þrettán nemenda sem útskrifast úr hársnyrtiiðn í VMA í vor.
Magnea er fjórði nemandinn í hársnyrtiiðn í VMA sem tekur hluta af sínu vinnustaðanámi á hársnyrtistofu í Þrándheimi en þetta hefur þróast í framhaldi af samstarfsverkefnum VMA og framhaldsskólans Charlottenlund í Þrándheimi. Þeir nemendur sem hafa farið til Þrándheims hafa sótt um og fengið Erasmus+ styrki sem duga fyrir flugi og uppihaldi ytra.
„Ég fékk boð um að fara út og ákvað að prófa. Ég fór út í lok maí og vann á stofunni Frisör Velde í miðborg Þrándheims í um sex vikur. Þetta var frábær reynsla, í senn skemmtilegt og lærdómsríkt. Áherslurnar voru á margan hátt líkar á þessari stofu og maður þekkir hér en þó er alltaf eitthvað nýtt sem maður lærir. Stór hluti af kúnnahópnum var yngra fólk en einnig margir eldri fastakúnnar og maður fékk því að spreyta sig á ýmsu. Ég kynntist helling af fólki þarna úti og lærði margt. Mér stendur til boða að farna þarna út aftur og það er alveg möguleiki að ég geri það. Er að skoða málin,“ segir Magnea og brosir þegar hún er spurð að því hvort hún hafi verið fljót að ná norskunni. „Já, málið kemur fljótt enda er norskan hálfgerð blanda af dönsku, íslensku og ensku.“