Höfðingleg gjöf Verkfærasölunnar
Það verður ekki annað sagt en að Elmar Þór Björnsson, verslunarstjóri Verkfærasölunnar á Akureyri, og Brynjar Schiöth, sölumaður fyrirtækisins á Akureyri, hafi í gær komið færandi hendi í byggingadeild VMA. Fyrir hönd Verkfærasölunnar færðu þeir byggingadeild að gjöf Milwaukee rafverkfæri að verðmæti á aðra milljón króna. Einnig komu þeir með ótal handverkfæri sem VMA keypti af Verkfærasölunni á góðum kjörum. Öll munu þessi nýju verkfæri nýtast vel fyrir nemendur og kennara í pípulögnum, sem er einn angi námsins í byggingadeild.
Elmar Þór segir það ánægjuefni fyrir Verkfærasöluna að geta lagt öflugu námi í byggingadeild VMA lið með þessum hætti en nú eru um fimm ár liðin síðan fyrirtækið opnaði verslun á Akureyri. Fyrst var hún í húsnæði við Dalsbraut en er nú til húsa að Tryggvabraut 14 - gengið inn frá Furuvöllum. Fyrirtækið var stofnað í Reykjavík árið 1997 og þar eru höfðustöðvarnar en einnig er verslun Verkfærasölunnar í Hafnarfirði. Einar Þór segir versluna á Akureyri ganga mjög vel og eiga sér dygga viðskiptavini hjá verktökum og almenningi.
Verkfærasalan flytur inn bandarísku Milwaukee vörurnar og sem fyrr segir gefur hún byggingadeild VMA búnað af þeirri gerð.
Að sjálfsögðu var boðið upp á köku í tilefni dagsins. Til móttökunnar mættu kennarar og nemendur í byggingadeild, þ.m.t. pípulagnanemar. Helgi Valur Harðarson, brautarstjóri byggingadeildar, og Sigríður Huld Jónsdóttir, skólameistari VMA, tóku til máls og þökkuðu Verkfærasölunni fyrir þessa höfðinglegu gjöf og þann stuðning sem fyrirtækið sýni skólanum með henni.
Á meðf. mynd eru frá vinstri: Hinrik Þórðarson, kennari í pípulögnum, Helgi Valur Harðarson, brautastjóri byggingadeildar, Benedikt Barðason, aðstoðarskólameistari VMA, Elmar Þór Björnsson, verslunarstjóri Verkfærasölunnar á Akureyri, Sigríður Huld Jónsdóttir, skólameistari VMA, og Brynjar Schiöth, sölumaður Verkfærasölunnar á Akureyri.