Fara í efni

Frá Þýskalandi í vélstjórn í VMA

Aron Haraldsson.
Aron Haraldsson.

Aron Haraldsson hóf nám í vélstjórn í VMA sl. haust. Leið hans í VMA er eilítið frábrugðin leið flestra skólafélaga hans því hann hefur aldrei áður stundað nám á Íslandi, þó svo að hann sé Íslendingur í húð og hár. Hann fæddist í Skotlandi en fluttist þaðan þriggja ára gamall til Þýskalands með foreldrum sínum og þar í landi hefur fjölskyldan búið í fimmtán ár og Aron verið í bæði grunn- og framhaldsskóla.

Haraldur Grétarsson, faðir Arons, er framkvæmdastjóri DFFU, dótturfélags Samherja, og er fyrirtækið með höfuðstöðvar í Cuxhaven. Fjölskyldan býr í átta þúsund manna bæ um 20 km fyrir utan borgina.

Aron, sem er fæddur 1998 og því á nítjánda ári, lauk stúdentsprófi sl. vor og ákvað að drífa sig beint í vélstjórnarnám á Íslandi. „Ég ákvað að taka þetta nám hér á landi vegna þess að það er mun fjölbreyttara en býðst úti. Hér er komið inn á t.d. kælitækni og rafmagn, sem er ekki í náminu úti,“ svarar Aron þegar hann er spurður af hverju hann hafi ákveðið að taka vélstjórnina hér á landi.

Stúdentsprófið í Þýskalandi gerir það að verkum að Aron hefur ágætan grunn og það styttir leiðina í náminu sömuleiðis. „Já, stúdentsprófið flýtir óneitanlega fyrir mér. Ég veit ekki hversu mikið en mögulega ca. eitt ár, það kemur bara í ljós,“ segir Aron og er mjög sáttur við námið í VMA. „Þetta er mjög skemmtilegt. Sannast sagna var ég ekkert of duglegur að stunda námið úti í Þýskalandi, en núna, þegar ég er virkilega farinn að læra það sem ég hef áhuga á, vil ég leggja metnað í þetta,“ segir Aron. Og það er ekki ofsögum sagt að metnaðurinn sé til staðar því á haustannarprófunum skilaði Aron einstökum námsárangri í vélstjórnarfögum, svo ekki verður betur gert. „Ég var á raungreinasviði í framhaldsskóla í Þýskalandi og góður grunnur í t.d. eðlisfræði hjálpaði mér verulega mikið,“ bætir hann við.

„Ég byrjaði að velta þessum möguleika aðeins fyrir mér fyrir tveimur árum en ákvað þetta endanlega á síðasta ári, eftir að hafa kynnt mér vélstjórnarnámið bæði hér á Akureyri og fyrir sunnan. Niðurstaðan var að koma hingað í VMA og ég sé ekki eftir því. Í raun hafði ég ekki aðrar tengingar hingað en að mamma og pabbi höfðu verið í námi við Háskólann á Akureyri. Síðar fór eldri bróðir minn, sem er tvítugur, til Íslands og tók stúdentspróf í Laugaskóla en býr nú hér á Akureyri. Sem stendur er ég á heimavist en að þessari önn lokinni mun ég búa með bróður mínum,“ segir Aron.

Hann segir að um margt sé nám á Íslandi og í Þýskalandi ólíkt. Hér ríki á vissan hátt meira frjálsræði. Hluti af einkunn í einstaka greinum í Þýskalandi segir Aron að taki mið af þátttöku nemenda í umræðum í tímum. Og vilji nemendur taka þátt í umræðum þurfi þeir undantekningalaust að rétta upp hönd.

„Ég hef ekki endanlega ákveðið hvað ég geri að loknu þessu námi en ég horfi til þess að fara eitthvað til sjós en síðan kemur sterklega til greina að fara áfram í verkfræði. Hugsun mín er ekki síst að hafa farið í gegnum verklegt nám eins og vélstjórnina sem nýtist síðan vel í frekara háskólanám,“ segir Aron. Hann segir að þó svo að hann hafi ekki áður verið í skóla á Íslandi hafi íslenskan ekki vafist svo mjög fyrir sér, að öðru leyti en því að skrifmálið hafi verið honum svolítið erfitt í fyrstu verkefnunum sl. haust, enda hafi hann ekki að baki mikla skrifþjálfun í íslensku. „Fyrsta skýrslan mín tók aðeins lengri tíma en þetta er allt að koma,“ segir Aron og brosir.