Ekki meiri aðsókn síðan fyrir hrun
Á þessari önn hófu rösklega fjörutíu nemendur nám í grunndeild bygginga- og mannvirkjagreina og hafa þeir ekki verið fleiri síðan fyrir efnahagshrunið árið 2008. Halldór Torfi Torfason, brautarstjóri byggingagreina, segir að þessar tölur endurspegli stöðuna á vinnumarkaði, þegar uppsveifla sé í samfélaginu sæki fleiri nemendur í byggingagreinarnar, greinileg fylgni sé þarna á milli.
Með efnahagshruninu dróst mjög saman aðsókn í byggingagreinar í VMA, enda þrengdist hagur iðnaðarmanna á vinnumarkaði mjög og margir þurftu að grípa til þess ráðs að flytja úr landi til þess að fá vinnu. Núna hefur þetta snúist við, nokkur þensla er á byggingamarkaði á nýjan leik og nóg er að gera fyrir iðnaðarmenn. Um leið eykst áhugi ungs fólks á að mennta sig í byggingagreinum og það hefur greinilega skilað sér inn í VMA.
Halldór Torfi segir sannarlega ánægjulegt að sjá svo marga nemendur í grunnnáminu, en þeir koma síðan til með að skiptast á hinar ýmsu byggingagreinar – t.d. húsasmíði, húsgagnasmíði, múrverk, pípulagnir, málaraiðn o.fl. Nám fyrir múrara hefur verið í gangi í VMA og lýkur því með brautskráningu í desember nk. Og Halldór Torfi segir ánægjulegt að geta upplýst að um áramót fari af stað nám fyrir þá sem vilja læra pípulagnir. Nokkuð er um liðið síðan þetta nám var síðast í boði í VMA. "Það hefur töluvert verið spurt um nám fyrir pípulagningamenn og því er gleðilegt að geta farið af stað með það á vorönn," segir Halldór Torfi.