Vorhlaup VMA í dag - skráning í fullum gangi
Vorhlaup VMA verður í dag, miðvikudaginn 3. apríl, og hefst kl. 17:30 við austurinngang skólans. Í Vorhlaupinu er áhersla lögð á holla útiveru þar sem skokkarar á öllum aldri koma saman og eiga skemmtilega sídegisstund. Keppt verður í grunnskólaflokki, framhaldsskólaflokki og opnum flokki. Að loknu hlaupi býðst hlaupurunum að gæða sér á dýrindis kjötsúpu í Gryfjunni sem matvælabraut VMA töfrar fram, jafnframt því sem verðlaun verða afhent. Verðlaunaafhending verður kl. 18:30. Síðan er tilvalið að skella sér í sund í Sundlaug Akureyrar að hlaupi loknu en hún býður öllum hlaupurum frítt í sund.
Það er sérlega ánægjulegt hversu fús fyrirtæki hafa verið að styrkja þennan árlega hlaupaviðburð. Veitt verða verðlaun fyrir sæti og einnig hafa allir keppendur möguleika á að vinna útdráttarverðlaun. Til dæmis verða dregin út Airpods frá Nova og 10 skipta klippikort í salat frá Ís- og salatgerðinni.
Í Vorhlaupi VMA er hægt að velja um tvær vegalengdir, 5 km og 10 km. Grunnskólanemendur geta bara tekið þátt í 5 km hlaupinu. Hér má sjá hlaupaleiðina, sem er 5 km, sem þýðir að 10 km hlaupararnir skokka tvo hringi. Sjáið allar nýjustu upplýsingar um hlaupið á fb-síðu hlaupsins.
Forskráningu í hlaupið lauk í gærkvöld en unnt er að skrá sig í hlaupið í dag. Verð fyrir báðar vegalengdir er:
500 kr fyrir grunnskóla- og framhaldsskólanema (f. 1999 og seinna).
2.000 kr fyrir hlaupara í opnum flokki (f. 1998 og fyrr).
Á hlaup.is eru allar nánari upplýsingar um hlaupið.