VMA í fjórða sæti í Boxinu

Boxið, framkvæmdakeppni framhaldsskólanna, fór fram sl. laugardag í húsnæði Háskólans í Reykjavík. Verkmenntaskólinn á Akureyri sendi frábært lið til keppni og gekk vel. Keppendur voru Unnar Bjarki Egilsson (sem var liðsstjóri), Finnur Ármann Óskarsson, Sigurður Tómas Árnason, Anna Lilja Benediktsdóttir og Ívar Dan Arnarson.

Fjórða sætið varð hlutskipti VMA (39 stig) og er það vel.  MR sigraði í ár (49 stig) og Tækniskólinn og VÍ sameinuðust um annað og þriðja sætið (40 stig).  
Allir skólarnir átta sem þátt töku í úrslitakeppninn sátu af sér eina umferð og var það hlutskipti VMA að sitja af sér síðustu umferðina.  Þegar þar var komið var VMA í öðru sæti og spennan mikil.  Niðurstaðan varð þó fjórða sætið eins og áður sagði og munaði einu stigi á verðlaunasæti.  Lið VMA fékk reyndar verðlaun frá Íslenskum Aðalverktökum fyrir að leysa þá þraut sem þeir höfðu umsjón með, með framúrskarandi hætti,
Fulltrúar VMA eiga hrós skilið fyrir frammistöðuna.  Það er gott að hafa svona sterka og útsjónarsama nemendur innanborðs og eru þeir öðrum hvatning til góðra verka og árangurs í leik og starfi.  Að sjálfsögðu tökum við þátt í keppninni á næsta ári og eðlilega höfum við sett viðmiðið hátt.

Hægt er að sjá myndband frá keppninni á Youtube