Viltu taka þátt í gerð myndbands um íslenskt mál?
Í september nk. er ætlunin að taka upp í Reykjavík samnorrænan þátt um íslenskt mál og af því tilefni stendur nú yfir leit að tveimur hæfileikaríkum einstaklingum – af báðum kynjum – á aldrinum 15-20 ára sem gætu tekið að sér að stjórna þættinum. Í VMA er eins og í öðrum framhaldsskólum landsins fullt af hæfileikaríku fólki sem er fullfært um að taka að sér þetta spennandi verkefni. Um er að ræða launaða vinnu. Nú er um að gera að sækja um!
Þátturinn er framleiddur og unninn af norska kvikmyndafyrirtækinu Snöball Film í samvinnu við Samtök móðurmálskennara og er ætlaður nemendum á öllum Norðurlöndunum. Nú þegar hafa verið gerðir sambærilegir þættir um dönsku, norsku og sænsku og eru þeir allir aðgengilegir á vefsíðunni Nordiskesprak.net. Þátturinn um íslenskuna verður einnig aðgengilegur á þessari vefsíðu.
Það sem beðið er um er að áhugasamir sendi úr farsímum sínum myndbandsupptöku þar sem viðkomandi segi frá uppáhaldsorði sínu í íslensku og einnig komi fram rökstuðningur fyrir því. Einnig komi fram í þessu stutta myndbandi hvaða orð eða orðatiltæki viðkomandi notar í samtölum við vini sína.
Umsóknarfrestur er til 1. september nk. Myndbandsprufurnar skal senda á Knut Åge Teigen, upptökustjóra hjá Snöball Film í Oslo á netfangið knut@snoball.no