Uppistandskvöld annað kvöld í Gryfjunni
Annað kvöld, miðvikudagskvöldið 21. september, stendur Þórduna – nemendafélag fyrir uppistandskvöldi í Gryfjunni í VMA og er óhætt að öllu verður til tjaldað. Húsið verður opnað kl. 20 og uppistandskvöldið hefst kl. 20.30. Frítt verður fyrir félaga í Þórdunu og Skólafélaginu Hugin í MA gegn framvísun skólaskírteinis en fyrir aðra kostar miðinn kr. 1500.
Á uppistandskvöldinu koma fram Þorsteinn Guðmundsson, einn af okkar elstu og fremstu uppistöndurum, Saga Garðarsdóttir, leikkona, sem hefur heldur betur látið til sín taka á þessum vettvangi, Hugleikur Dagsson, teiknari og fjöllistamaður, og Bylgja Babýlons, sem verður að teljast til hóps efnilegustu uppistandara landsins.
Það verður sem sagt grín og glens í öndvegi í Gryfjunni annað kvöld. Full ástæða til þess að fjölmenna og gráta úr hlátri!