Undirbúa útgáfu Mjölnis
Það er alltaf sérlega ánægjulegt þegar nemendur eru stórhuga og einhenda sér í metnaðarfull og stór verkefni. Þær stöllur Harpa Lísa Þorvaldsdóttir og Þórunn Ósk Jóhannesdóttir sáu sl. vor auglýst eftir fólki til þess að gefa kost á sér í trúnaðarstörf á vegum nemendafélagsins Þórdunu. Þar á meðal var útgáfa skólablaðsins Mjölnis. Þetta var verkefni sem þeim fannst áhugavert að takast á við og létu slag standa. Harpa Lísa er nýr ritstjóri Mjölnis en Þórunn Ósk heldur utan um markaðsmálin. Þær eru stórhuga og stefna að því að koma út tveimur blöðum í vetur, annars vegar í nóvember nk. og seinna blaðið komi síðan út á vorönninni. Og þær ætla ekki að láta þar við sitja, heldur hyggjast þær sjá um vinnslu og útgáfu leikskrár söngleiksins Bugsy Malone sem verður, eins og áður hefur komið fram, settur upp á svið eftir áramót.
Harpa Lísa er Akureyringur en Þórunn Ósk Skagfirðingur, frá bænum Álftagerði. Þær segjast ekki hafa tekið að sér slíkt verkefni áður en gera sér fulla grein fyrir að það verði krefjandi en skemmtilegt. „Ég hef mikinn áhuga á þessu og stefni að því að fara í fjölmiðlafræði í Háskólanum á Akureyri að loknu námi hér í VMA,“ segir Harpa en báðar stunda þær nám á félags- og hugvísindabraut, eru á þriðja ári og stefna á útskrift í vor.
„Við höfum ekki verið í blaðaútgáfu en komið að félagslífinu hér í skólanum á annan hátt. Harpa lék í Ávaxtakörfunni og ég tók þátt í uppfærslu Leikfélags VMA á Litlu hryllingsbúðinni. Við tókum síðan þátt í vinnu við nýnemahátíðina í síðustu viku,“ segir Þórunn Ósk.
„Það má eiginglega segja að við höfum byrjað strax síðastliðið vor að velta upp ýmsum hugmyndum í sambandi við efni blaðsins og reyna að forma það. Síðustu daga höfum við hins vegar meira að að hafa samband við fyrirtæki varðandi auglýsingar og stuðning við útgáfuna. Síðan förum við á fullt í að vinna efnið og höfum þegar fengið vilyrði nokkurra nemenda um að skrifa efni og viljum biðla til fleiri um að leggja okkur lið. Nemendur eru hvattir til þess að setja sig í samband ef þeir luma á áhugaverðu efni eða hafa góðar hugmyndir um efni. Hægt er að senda á okkur póst á netfangið mjolnirvma1@gmail.com. Einnig viljum við endilega biðla til nemenda sem hafa áhuga og kunnáttu á grafískri hönnun að setja sig í samband við okkur varðandi uppsetningu blaðsins. Við þiggjum allar fúsar vinnuhendur,“ segja þær Harpa Lísa og Þórunn Ósk.
Útgáfa Mjölnis hefur verið ansi stopul á undanförnum árum og um hríð hefur blaðið ekki komið út. Hér má sjá tvö síðustu Mjölnisblöðin. „Við ætlum að hafa blaðið í A4 broti og stefnan er að það verði sem næst 50 síður að stærð,“ segja hinar kraftmiklu Mjölniskonur, Harpa Lísa Þorvaldsdóttir og Þórunn Ósk Jóhannesdóttir.