Umsóknarfrestur um fjarnám VMA til 31. ágúst
Þó svo að dagskólinn sé hafinn í VMA er fjarnámið þó ekki hafið. Nú stendur yfir skráning í fjarnámið og lýkur að rúmri viku liðinni, fimmtudaginn 29. ágúst nk.
Efst hér á forsíðu heimasíðunnar er flipi þar sem allar upplýsingar um fjarnámið er að finna, m.a. eru þar upplýsingar um áfangana sem eru í boði núna á haustönn. Nánari upplýsingar veita Baldvin B. Ringsted, sviðsstjóri verk- og fjarnáms.
Fjarnám í VMA byggist á kennsluleiðbeiningum og verkefnum í gegnum kennsluvefinn Moodle og/eða með tölvupóstsamskiptum. Nemendur skila verkefnum í gegnum Moodle og geta tekið lokapróf í sinni heimabyggð í samráði við samstarfsaðila.
Nám, námsefni, yfirferð, kennsla og kröfur í fjarkennslu VMA eru í samræmi við kröfur í dagskóla. Námsgögn geta verið alfarið á Moodle-síðu áfangans og/eða kennslubækur sem hægt er að kaupa í bókabúðum. Í námsáætlun kemur fram það námsefni sem liggur að baki áfanganum, upplýsingar um yfirferð og skipulag námsins ásamt upplýsingum um námsmat. Nemendur fá námsáætlun í upphafi annar.
Rétt er að undirstrika að iðnmeistaranám er í boði í fjarnámi VMA og er það fyrir þá sem lokið hafa sveinsprófi í iðngrein. Iðnmeistaranám skiptist í megindráttum í þrennt: almennt bóknám, nám í stjórnunar- og rekstrargreinum og fagnám. Almennt bóknám ásamt stjórnunar- og rekstrargreinum skiptist í kjarna (skyldunám) annars vegar og valnám hins vegar og er valnámið mismikið að vöxtum eftir iðngreinum. Í meistaraskóla VMA er unnt að ljúka námi í almennum bóknámsgreinum og stjórnunar- og rekstrargreinum.