Skráningarfrestur í fjarnám VMA til 5. september

Dagskólinn í VMA er hafinn en það er hins vegar fjarnámið ekki. Innritun er í fullum gangi í fjarnám VMA og er umsóknarfrestur til 5. september nk. Kennsla hefst í síðasta lagi 10. september. Hér á heimasíðu VMA er að finna allar upplýsingar um fjarnámið. Nánari upplýsingar gefur Baldvin B. Ringsted, sviðsstjóri verk- og fjarnáms.

Markmið með fjarkennslu VMA er að gefa þeim kost á námi sem ekki geta stundað það í dagskóla. Tekið skal fram að nemendur í fjarnámi geta jafnframt verið dagskólanemendur í VMA eða öðrum framhaldsskólum. Kennt er á vefnum, annað hvort með tölvupóstsamskiptum og/eða í gegnum kennsluforritið Moodle. Til þess að komast inn á Moodle fá nemendur sent lykilorð á það netfang sem þeir gefa upp í umsóknum sínum. Hér eru nánari upplýsingar um framvindu námsins.

Námsframboð í fjarnámi er sem fyrr fjölbreytt. Hér má sjá lista yfir áfanga sem eru í boði í fjarnáminu núna á haustönn.

Sem fyrr er boðið upp á nám í meistaraskóla og eins og kemur fram hér á heimasíðunni hefur verið tekin upp ný námskrá meistaranáms og hafa þrjú starfsgreinaráð samþykkt hina nýju námskrá; bílgreinar, málmiðngreinar og rafiðngreinar.