Setið við vefstólinn
Nákvæmni, þolinmæði og yfirvegun er gott veganesti þegar setið er við vefstólinn. Þegar litið var inn í rýmið þar sem vefstólarnir eru á listnáms- og hönnunarbrautinni í VMA voru textílnemendur í kennslustund í vefnaði með Borghildi Ínu Sölvadóttur kennara.
Einn af nemendunum er Ívar Malmquist Hoblyn. Hann býr á Akureyri en á rætur sínar á Ísafirði. Hann sagðist hafa farið á listnáms- og hönnunarbrautina í VMA árið 2018 og valið að fara á textíllínuna. Hann segist kunna því vel að vefa, það sé skemmtileg áskorun. „Ég var nokkuð ákveðinn í því að fara ekki í hreint bóknám og valið stóð um að fara á íþróttabraut eða listnáms- og hönnunarbraut. Ég er mjög sáttur við þetta nám,“ segir Ívar.
Nemendurnir voru að vefa trefla þegar kíkt var í heimsókn. Borghildur Ína kennari segir að vefnaðurinn taki sinn tíma og sé nákvæmnisvinna en undirbúningur vefnaðarins taki líka djúgan tíma, í þessu eins og svo mörgu öðru þurfi grunnurinn að vera góður til þess að byggja ofan á.
Þetta er annar áfanginn í vefnaði sem nemendurnir taka. Grunnáfangann tóku nemendur á vorönn 2020 en reyndar setti kórónuveirufaraldurinn þá strik í reikninginn þegar þurfti að loka skólanum seinnipartinn í mars.