Fara í efni

Samstarf VMA og MA um námsáfanga

Hallgrímur kennir nemendum grunninn í teikningu.
Hallgrímur kennir nemendum grunninn í teikningu.

Á þessari önn eiga framhaldsskólarnir á Akureyri, VMA og MA, með sér samstarf um nemendaskipti, ef svo má segja. Nemendur koma úr MA í VMA og taka þar áfanga sem ekki er í boði í þeirra skóla og öfugt. 

Á þessari önn taka fjórir nemendur úr MA, sem eru á öðru ári í skólanum, grunnáfanga í teikningu á listnáms- og hönnunarbraut VMA - SJÓN1TF05. Þessi áfangi er ekki í boði í MA.

Að sama skapi sækja þrír nemendur úr VMA eðlisfræðiáfanga í MA, sem ekki er í boði á þessari önn í VMA. Einn þessara nemenda er af náttúruvísindabraut og tveir úr rafvirkjun/rafeindavirkjun.

Þegar litið var inn á listnáms- og hönnunarbraut í gær voru MA-ingarnir þrír þar ásamt nemendum úr VMA í grunnáfanga í teikningu hjá Hallgrími Ingólfssyni kennara. Glíman við þrívíddina var verkefni dagsins, hvernig bæri að varpa mynd af lauki með blýantinum einum yfir á pappírinn. Virkar einfalt en er það hreint ekki. Rökhugsun er einn þáttur, færni annar og mikil æfing þriðji þátturinn.