Plast er ekki bara plast
Bifvélavirkjun er sex anna nám í VMA. Fyrst eru nemendur í tvær annir í grunndeild málm- og véltæknigreina en eru eftir það í fjórar annir í faggreinum bifvélavirkjunar. Eins og hér má sjá er námið fjölbreytt og er leitast við að búa nemendur sem best undir að starfa í iðngreininni. Auk sex anna náms í skóla þurfa nemendur að vinna ákveðinn fjölda vikna á samningi á verkstæði til þess að geta farið í sveinspróf og fengið formleg starfsréttindi.
Þegar litið var inn til nemenda á fimmtu önn í bifvélavirkjun var Stefán Bjarnhéðinsson, sem rekur Bílaverkstæði Bjarnhéðins ehf. á Akureyri, að kenna þeim áfangann Plast, greining og viðgerðir, þar sem farið er í ýmislegt er varðar plast í bílum og hvernig best sé að gera við ef það til dæmis brotnar í umerðaróhöppum.
Plastefni í bílum hafa á síðari árum aukist mjög, enda léttir plastið bílana og gerir þá þolnari gagnvart tæringu. Að sjálfsögðu ræðst það töluvert af því hversu mikill skaðinn er eftir t.d. umferðaróhapp hvort ákveðið er að skipta um hinn skemmda plasthlut eða gera við hann. En til þess að gera við plasthlut þarf fyrst að vita hvort plastið er hitadeigt eða hitafast. Hið fyrrnefnda, hitadeigt plast, er bæði hægt að líma og sjóða en hitafasta plastið er einungis hægt að líma. Þegar litið var inn í tíma voru nemendur að þjálfa sig í því að sjóða saman plast en þá er notast við heitt loft sem bræðir plastborðann við þann hlut sem gert er við. Suðuhiti fyrir hitadeigt plast er á bilinu 270 til 360 °C og því er betra að fara að öllu með gát.
Stefán Bjarnhéðinsson segir að við meðhöndlun og viðgerðir á plasthlutum í bíla sé mikilvægt, eins og í mörgu öðru, að horfa til umhverfismála. Við það t.d. að slípa plast myndist plastrykagnir sem séu aðskotahlutir í náttúrunni og því beri að varast að þær fari í niðurfallskerfi og endi út í sjó eða fari á annan hátt út í náttúruna. Umhverfisþátturinn sé mikilvægur og á hann leggi hann áherslu við kennslu þessa áfanga.