Öryggisvitund er mikilvægasta hugtakið
„Eitt hugtak er öðrum mikilvægara fyrir ykkur að muna, það er öryggisvitund,“ sagði Magnús Halldórsson, sem ásamt Þórhalli Matthíassyni frá fyrirtækinu Haga ehf. heimsótti VMA í liðinni viku og hélt fyrirlestur fyrir nemendur á öðru ári í húsasmíði um fallvarnir.
Magnús Halldórsson hefur langa og fjölþætta reynslu af öryggismálum. Hann lærði á sínum tíma húsasmíði og síðar byggingaiðnfræði í Tækniskólanum gamla. Magnús rak verktakafyrirtæki um tíma og starfaði líka í Bandaríkjunum hjá verktakafyrirtæki, þar sem hann segist hafa kynnst alveg nýrri hlið á öryggismálum og sá tími hafi opnað augu hans fyrir mikilvægi þess að huga vel að öllum öryggismálum starfsmanna á byggingarstað, ekki síst fallvörnum. „Sem dæmi get ég nefnt að hjá þessu bandaríska fyrirtæki var varið 5-10 mínútum í fund á hverjum morgni til þess að fara yfir öryggismálin,“ segir Magnús.
Að Bandaríkjadvölinni lokinni kenndi Magnús í nokkur ár í Iðnskólanum í Reyjavík og síðan starfaði hann í nokkur ár hjá öryggisfyrirtækinu Dynjandi en nú er hann í samstarfi við Haga, sem selur allskyns öryggisvörur, þar með talinn fallvarnabúnað.
Magnús fór vítt og breitt yfir mikilvægi þess að fyrirtæki í t.d. byggingariðnaði hefðu þessa hluti í lagi og hann lagði á það áherslu að ábyrgðin væri fyrirtækjanna og starfsmenn hefðu skýlausan rétt til þess að krefjast þess að enginn afsláttur væri gefin í öryggismálum – hvort sem það ætti við um fallvarnabelti, líflínu eða eitthvað annað. En því miður sagði Magnús að þrátt fyrir að vakning hafi orðið í þessum efnum væri það nú svo að fallslys væru enn hlutfallslega algengust alvarlegra slysa á byggingarstað.
Mikil áhersla er lögð á öryggismálin frá fyrsta degi í náminu í byggingadeild VMA og voru fyrirlestrar Magnúsar og Þórhalls um fallvarnabúnað fyrir tvo hópa nema á öðru ári í húsasmíði gott innlegg í þá umræðu. Góð visa er aldrei of oft kveðin, segir máltækið og það á vel við um notkun viðurkennds öryggisbúnaðar.