Nýr nemendahópur í múrsmíði
Á þessari önn byrjar hópur níu nemenda nám í múrsmíði en síðasti hópurinn í múrsmíði í VMA lauk námi árið 2018. Fyrsta kennslustundin var sl. föstudag og annast Bjarni Bjarnason, múrarameistari á Akureyri, kennsluna, eins og síðast.
Múrsmíði er ein þeirra greina sem eru kenndar í byggingadeild VMA og ræðst af fjölda umsókna á hverjum tíma hvenær fagið er kennt. En til þess að komast í múrsmíðina þurfa nemendur að hafa lokið fyrstu önninni í grunndeild byggingagreina. Bjarni segir að námið í múrsmíði sé fjórar annir og skiptist sá tími á bóklegar og verklegar greinar. Á þessari fyrstu önn í náminu segir hann að námið sé fyrst og fremst bóklegt en um múrsmíðina gildir að nemendur þurfa að hafa lokið 72 vikum á námssamningi til þess að geta farið í sveinspróf.
Þegar litið var inn í fyrstu kennslustundina í múrsmíði hjá þessum nýja námshópi voru sjö af níu nemendum mættir. Á nemendunum mátti heyra að sumir hafa unnið töluvert nú þegar í múrsmíði en einnig eru þess dæmi að nemendur fari beint úr grunndeildinni í þetta nám.
Múrsmíðin hefur sem fag tekið töluverðum breytingum í tímans rás, eins og margar aðrar iðngreinar. Þannig segir Bjarni að flísalögn sé orðin nokkuð stór hluti af vinnu múrara en eftir sem áður er og verði alltaf full þörf á hinu klassíska múrverki í húsum, jafnt innan sem utan dyra.