Ný beygjuvél en sú gamla til Hafborgarútgerðarinnar
Núna í byrjun annar fékk málmiðnbrautin í VMA nýja beygjuvél, sem er ein af þessum nauðsynlegu vélum í málmsmíði, bæði fyrir þá sem eru að taka sín fyrstu spor í málmsmíðinni og þá sem lengra eru komnir.
Þegar Hörður Óskarsson brautarstjóri á málmiðnbraut sá þá feðga sem gera út Hafborgina í Grímsey auglýsa á fésbókinni eftir notaðri beygjuvél hafði hann samband við þá og úr varð að gamla beygjuvélin hefur nú fengið nýtt hlutverk í útgerð Hafborgar.
Útgerð Hafborgar EA 152 er fjölskyldufyrirtæki og gaman er að segja frá því að þeir feðgar sem standa að útgerðinni hafa allir fengið sinn grunn í VMA. Útgerðarmaðurinn Guðlaugur Óli Þorláksson tók ákveðinn grunn á málmiðnbrautinni og vélstjórn og synirnir hafa fetað sömu slóð, Guðlaugur Óli Guðlaugsson og tvíburarnir Ásbjörn og Þórólfur Guðlaugssynir. Allir eru þeir feðgar því fyrrum nemendur Harðar Óskarssonar.
Í stað gömlu beygjuvélarinnar sem nýtist nú Hafborgarmönnum vel færðu þeir málmiðnbrautinni tvo nýja Makita slípirokka sem munu nýtast vel í kennslunni.
Þessar myndir voru teknar þegar þeir feðgar mættu á málmiðnbrautina færandi hendi og óku á brott með beygjuvélina. Einnig má sjá nýju beygjuvélina.