Nemendur frá August Sander skólanum í Berlín á Akureyri
Undanfarin tvö ár hefur VMA átt í góðum samskiptum við August Sander skólann í Berlín í Þýskalandi. Hingað til Akureyrar hafa komið sautján nemendur frá skólanum og tekið hluta af vinnustaðanámi sínu á leikskólum Akureyrar. Í síðustu viku komu þrír nemendur frá skólanum og eru nú í vinnustaðanámi á Pálmholti, Síðuseli og Holtakoti og verða fram í miðjan desember. Þessir þrír nemendur eru 17, 20 og 26 ára gamlir.
Þetta er í fimmta skipti sem nemendur koma frá August Sander skólanum og segir Jeanette Reppe kennari við skólann, sem kom til Akureyrar í síðustu viku með nemendunum þremur, að þetta samstarf hafi gengið sérlega vel og sé nemendunum afar mikils virði. Mikilvægt sé fyrir þá að kynnast einhverju nýju, sem í einhverjum tilfellum sé frábrugðið því sem þekkist í Þýskalandi, og þá sé þroskandi fyrir nemendur að vinna í öðru landi og kynnast nýjum straumum á þann hátt.
Þeir nemendur sem um ræðir eru í tveggja ára námi til félagsliða og segir Jeanette töluvert algengt að nemendur haldi áfram námi að loknu félagsliðanáminu og ljúki leikskólakennaranámi.
Hér er Jeanette Reppe með Hildi Friðriksdóttur, sem sér um erlend samskipti í VMA, og Jóhannesi Árnasyni áfangastjóra.
Auk þess að starfa á leikskólum á Akureyri fá nemendur fimm kennslustundir í íslensku og annast Anna María Steinke kennari við VMA þann námsþátt.
Þetta samstarfsverkefni við August Sander skólann er eitt nokkurra áhugaverðra erlendra verkefna sem VMA tekur þátt í.
Hér eru nýjustu fréttir af gangi mála í þessum erlendu verkefnum.