Mín leið opnuð í Listasafninu
Á morgun, laugardaginn 19. nóvember kl. 15, verður Mín leið, sýning brautskráningarnemenda á listnáms- og hönnunarbraut VMA, opnuð í Listasafninu á Akureyri. Sýningin stendur til sunnudagsins 27. nóvember nk.
Liður í náminu á listnáms- og hönnunarbraut er að vinna lokaverkefni til sýningar í Listasafninu. Alltaf er efnt til sýningar undir lok hverrar annar, á haust- og vorönn. Þetta er sjöunda árið í röð sem sýningarnar eru haldnar í samstarfi við Listasafnið á Akureyri. Sýningarnar eru ólíkar að gerð og umfangi, allt fer það eftir fjölda brautskráningarnema. Að þessu sinni sýna fjórir nemendur verk sín; Eyrún Arna Ingólfsdóttir, Júlía Jökulrós Sveinsdóttir, Marcus Emil Sigurbjörnsson og Natalía Sól Jóhannsdóttir.
Nemendur vinna að lokaverkefni sínu yfir heila önn og í þeirri vinnu felst ákveðin hugmynda- og rannsóknarvinna, vinna við mótun verksins og síðan uppsetning þess á sýningunni í Listasafninu í samvinnu við leiðsagnarkennara og samnemendur þar sem horft er til frumkvæðis, hugmyndaauðgi og agaðra vinnubragða.