Mennta- og barnamálaráðherra heimsækir VMA
Guðmundur Ingi Kristjánsson, mennta- og barnamálaráðherra, sótti VMA heim í dag ásamt tveimur starfsmönnum ráðuneytisins. Ráðherra hefur að undanförnu heimsótt framhaldsskóla og hyggst ná því takmarki að heimsækja þá alla á næstu dögum og vikum.
Ráðherra hóf heimsóknina í VMA á því að ganga um skólann í fylgd skólameistara og aðstoðarskólameistara og fulltrúa úr stjórn Þórdunu og fræðast um skólastarfið. Síðan átti hann fund með starfsfólki þar sem hann fór yfir ýmis mál sem unnið er að í ráðuneytinu er lýtur að framhaldsskólum, m.a. viðbyggingar við verknámsskóla, þar á meðal VMA. Einnig fór hann yfir hugmyndir að nýju skipulagi fyrir opinbera framhaldsskóla sem hafi að markmiði að styrkja framhaldsskólastigið, efla starf skólanna og þjónustu við nemendur.
Mennta- og barnamálaráðherra og starfsfólki ráðuneytisins eru færðar þakkir fyrir heimsóknina í VMA í dag.