Með hendur í hári í Þrándheimi
Þrír nemendur á hársnyrtibraut, Arnheiður Sigrún Gísladóttir, Valdís Jósefsdóttir og Ólöf Ásta Kristjánsdóttir, fóru til Þrándheims í Noregi fyrr í þessum mánuði ásamt Hildi Salínu Ævarsdóttur brautarstjóra til þess að kynna sér aðstæður þar í þeim tilgangi að taka mögulega starfsnám sitt þar. Voru þær ytra í fimm daga og þar af unnu þær hver á sinni hárgreiðslustofunni í þrjá daga.
Á undanförnum árum hefur komist á gott samstarf milli VMA og fjölgreinaskólans í Charlottenlund í Þrándheimi og meðal þeirra möguleika sem hafa opnast er að nemendur á hársnyrtibraut taki starfsnám sitt á hárgreiðslustofum í Þrándheimi, sem kemur sér vel því í mörgum tilfellum hefur reynst erfitt fyrir nemendur að komast á námssamninga og ljúka náminu. Nú þegar hefur einn nemandi farið frá VMA til Þrándheims, Dagný Hrund Björnsdóttir, og hefur hún starfað þar síðan í byrjun september sl. Gengur það í alla staði vel.
Verkmenntaskólinn fékk á síðasta ári svokallaðan Erasmus + styrk sem opnaði á þann möguleika að nemendur í verknámi í VMA geti tekið verknám sitt erlendis. Dagný Hrund var fyrst til þess að fá stuðning af þessum Erasmus + styrk vegna starfsnámsins í Þrándheimi.
Þær Arnheiður, Valdís og Ólöf Ásta voru hæstánægðar með ferðina til Þrándheims og sögðust hafa fengið góðar móttökur á þeim stofum sem þær störfuðu. Þær gengu þar í hin daglegu störf og fengu líka módel á stofurnar til þess að spreyta sig á og sýna fram á hvað þær kynnu. Þær stöllur eru núna á fjórðu af fimm skólaönnum en auk skólatímans þurfa þær að vinna á stofu í 72 vikur. Þær eru sammála um að íslenskir hárgreiðslunemar standist fyllilega samanburð við nemendur í Noregi.
En þá er það spurningin, eru þær á leið til Þrándheims? Þær segja það koma vel til greina ef takist að hnýta alla lausa enda. Starfsumhverfið sé áhugavert, stressið minna en þær upplifi hér og þarna gefist prýðilegt tækifæri til þess að víkka út sjóndeildarhringinn og læra norsku.