Fara í efni

Lengi stefnt á arkitektúr

Birta Hermannsdóttir við akrýlmyndina sína.
Birta Hermannsdóttir við akrýlmyndina sína.

Akureyringurinn Birta Hermannsdóttir fór haustið 2017 á listnáms- og hönnunarbraut VMA af þeirri ástæðu að hún taldi námið þar góðan grunn fyrir nám í arkitektúr sem hún hefur lengi stefnt á. Birta segist sannfærðari en áður um að hún hafi valið rétt, námið á listnáms- og hönnunarbrautinni hafi aukið enn frekar áhuga hennar á arkitektúrnum.

„Námið hefur verið fjölbreyttara en ég átti von á og ég tel að það muni reynast mér góður grunnur í framhaldinu, t.d. listasagan, mismunandi listsköpun, tölvunotkun o.fl. Ég hafði engan brennandi áhuga á því að teikna eða mála þegar ég hóf námið en smám saman hefur það kveikt þann áhuga. Fyrst og fremst hafði ég verið í bóklegu námi í grunnskóla en síðan hafa verklegir áfangar verið stór hluti af náminu hér. Það var skemmtileg tilbreyting og hefur hentað mér vel,“ segir Birta.

Hún segist ekki vita hvaðan áhugi hennar á arkitektúr kemur en hún hafi lengi haft ánægju af því að velta fyrir sér og raða hlutum upp í rými.

Núna á vorönn, síðustu önn Birtu í VMA, segist hún fyrst og fremst vera í bóklegum áföngum til stúdentsprófs en auk þess vinni hún að lokaverkefni á listnámsbrautinni. Ekki kemur á óvart að verkefni Birtu lýtur að hönnun húsa, það felst í því að hanna hús í þrívíddarforriti og ef vel gengur ætlar hún að þrívíddarprenta húsið. Með lokaverkefninu fetar Birta sig í átt að næsta námsstigi, háskólanámi í annað hvort arkitektúr eða innanhússarkitektúr. „Ég horfi til þess að taka mér eins árs pásu frá námi til þess að safna mér pening og velta betur vöngum yfir framhaldinu en eins og er ég er spennt fyrir því að fara til útlanda í innanhússarkitektúr, mér finnst London áhugaverður kostur,“ segir Birta.

Á vegg gegnt austurinngangi VMA er akrýlmyndverk eftir Birtu, sem hún vann í málunaráfanga hjá Björgu Eiríksdóttur. Verkið er litskrúðugt og segir hún að það sé undir áhrifum af skúlptúrum myndlistarmannsins Richards Serra, m.a. risastórs verks hans í flugstöð í Toronto í Kanada.