Leikfélag VMA sýnir söngleikinn Bugsy Malone í vetur
Leikfélag VMA gjörir kunnugt: Uppfærsla vetrarins verður söngleikurinn Bugsy Malone! Ekki er ráðist á lágan garð, er óhætt að segja. Freysteinn Sverrisson formaður Leikfélags VMA og Arndís Eva Erlingsdóttir varaformaður Leikfélags VMA eru sammála um að þessi leiksýning verði trúlega sú stærsta sem félagið hefur ráðist í og segjast þau vera afar spennt fyrir verkefninu.
Bugsy Malone kom upphaflega fram á sjónarsviðið sem kvikmynd sem óhætt er að segja að hafi slegið í gegn. Lögin úr kvikmyndinni urðu afar vinsæl og lifa ennþá. Síðar var unnin leikgerð upp úr myndinni og íslenska þýðingin hefur verið færð upp á svið hér á landi og notið mikilla vinsælda.
„Við vildum setja upp verk sem höfðaði til fólks á öllum aldri. Ég hef þá tilfinningu að þetta eigi eftir að verða mjög skemmtilegt,“ sagði Freysteinn og Arndís bætti við að hér væri sannarlega um stórsýningu að ræða því mikið væri lagt í bæði söng og dans.
„Leikfélag VMA hefur eflst með hverju árinu. Síðastliðinn vetur settum við upp Ávaxtakörfuna í Hofi og hún sló rækilega í gegn. Sú sýning færði okkur sjálfstraust og kraft til þess að takast á við enn stærra verkefni núna. Það má segja að Ávaxtakarfan hafi komið okkur á blað og við viljum byggja ofan á reynslu okkar úr þeirri uppfærslu. Við þurfum fullt af fólki til þess að vinna að uppfærslunni – bæði til þess að leika og vinna að öllum öðrum verkefnum í kringum sýninguna,“ segir Freysteinn og Arndís bætir við að hún hafi þá trú að nemendur sýni áhuga á því að koma að uppfærslunni eftir velgengni og þá stemningu sem skapaðist í kringum Ávaxtakörfuna. „Það eru að sjálfsögðu allir nemendur VMA velkomnir að vinna að þessu stóra verkefni og sérstaklega vil ég hvetja nýnema til þess að taka þátt. Að taka þátt í leikuppfærslu er afar góð leið til þess að komast inn í félagslífið og kynnast skemmtilegu fólki sem allt vinnur að því sameiginlega verkefni að setja upp leiksýningu. Það er mjög gefandi og skemmtilegt. Það er ekki spurning að við höfum verið að taka markviss skref fram á við í leiklistinni og ég tel að við höldum áfram á þeirri braut með uppfærslu á Bugsy Malone,“ segir Arndís.
Gunnar Björn Guðmundsson hefur verið ráðinn leikstjóri sýningarinnar. Hann hefur unnið við sjónvarp/kvikmyndir og leikhús í rúmlega tvo áratugi. Gunnar Björn leikstýrði kvikmyndunum Astrópíu og Gauragangi og Áramótaskaupi RÚV árin 2009, 2010, 2011 og 2012. Þá gerði hann Karamellumyndina sem hlaut Edduverðlaunin sem besta stuttmynd ársins 2003. Hann hefur leikstýrt sjónvarpsþáttum, tónlistarmyndböndum og sett auk þess upp fjölda leiksýninga.
Dagana 5. og 6. október verða leik- og söngprufur fyrir uppfærsluna á Bugsy Malone og er gert ráð fyrir að fjórum dögum síðar verði lokið við að skipa í hlutverk. Í kjölfarið hefjast æfingar á verkinu og verður æft framundir haustpróf í desember og síðan aftur hafist handa eftir áramót. Frumsýning verður í febrúar og eru allar líkur á að sýnt verði í Menningarhúsinu Hofi, eins og Ávaxtakarfan sl. vetur.
Leik- og söngprufur verða auglýstar nánar þegar nær dregur. Nemendur eru eindregið hvattir til þess að skella sér í prufur og/eða taka þátt í öðrum verkefnum, því þar er af nógu að taka - hárgreiðsla, förðun, leikmyndasmíði, búningagerð o.s.frv.