Kitluðu bragðlaukana í ríkum mæli
Mikilvægur þáttur í námi matreiðslunema í 3. bekk og framreiðslunema í 2. bekk eru alvöru verklegar æfingar, eins og um væri að ræða eldamennsku og framreiðslu á veitingahúsum. Matreiðslu- og framreiðslunemar lögðu saman krafta sína í kvöld og niðurstaðan var dásemdar fimm rétta kvöldverður í Þrúðvangi, sal matvæla- og ferðamálabrautar VMA, sem kitlaði heldur betur bragðlauka boðsgesta.
Allir matreiðslunemarnir lögðu saman krafta sína í kvöldverðinn og hluti nemanna sem nú eru í 2. bekk í framreiðslu. Vel var að verki staðið á allan hátt og útkoman var hreint frábær.
Matseðil kvöldsins útfærðu matreiðslunemarnir í sameiningu. Hann var eftirfarandi:
Réttur 1
Kjúklingalifra parfait með freyðivínssósu, fennelskál og sýrðu vatnsmelónusalsa.
Réttur 2
Hægeldaður þorskur mosaic, beurre monte, laukkex, silungahrogn og sýrð epli.
Réttur 3
Sætkartöfluravioli með salvíurjóma.
Réttur 4
Lambakóróna með brenndu jarðskokkamauki, parmesan, grænmeti, sýrðum sykurbaunum, bok choy, demi glaze og sveppakexi.
Réttur 5
Karamellusúkkulaðihálfkúla – karamellusúkkulaðimús, hindberja confit, hnetusmjörkex, hnetusmjör chantilly, súkkulaðiperlur og passionfruit sorbet.