Jörundur Frímann framhaldsskólameistari í 10 km hlaupi
Að vanda fór vegleg sveit nemenda og kennara frá VMA suður yfir heiðar til þátttöku í Flensborgarhlaupinu í Hafnarfirði. Hlaupið fór fram sl. þriðjudag og tóku 37 nemendur úr VMA þátt í hlaupinu.
Í ár hittist svo skemmtilega á að hlaupið fór fram í heilsuvikunni í VMA sem lýkur formlega í dag en að sjálfsögðu halda nemendur og kennarar skólans áfram ótrauðir að stunda holla hreyfingu.
Bæði var í boði 5 og 10 km hlaup og tóku VMA-nemar þátt í báðum vegalengdum. Fulltrúar VMA létu til sín taka í hlaupinu og stóðu á efsta palli að hlaupi loknu. Jörundur Frímann Jónasson náði öðrum besta tímanum í 10 km hlaupi karla, 18 ára og eldri. Varð hann jafnframt fljótastur framhaldsskólanema í hlaupinu og er því framhaldsskólameistari í 10 km hlaupi þetta árið. Sigurður Bergmann sigraði sinn flokk, 17 ára og yngri, í 10 km hlaupi og kennarinn Anna Berglind Pálmadóttir sigraði 10 km hlaupið í kvennaflokki, 18 ára og eldri.
Hér má sjá tíma þátttakenda í Flensborgarhlaupinu. Þessar myndir tók Valgerður Dögg Jónsdóttir kennari.