Í fjarkennslu í stærðfræði í Pascal-peysunni
Einn af þeim kennurum sem hefur frá fyrsta degi kennt samkvæmt stundaskrá, eins og í dagskóla, er Elín Björk Unnarsdóttir, sem á þessari önn kennir nokkra stærðfræðiáfanga. Elín er búsett á Dalvík og kennir úr fjarkennsluveri á heimili sínu.
„Frá mínum bæjardyrum séð gengur kennslan vel og sömu skil eru hjá nemendum á verkefnum og voru áður. Við höfum algjörlega getað haldið okkar yfirferð á námsefninu og það hefur bara gengið vel. Mér finnst virkni nemenda í fjarnámi og í dagskóla vera svipuð, þeir sem sýndu mesta virkni í dagskóla gera það áfram en hinir sýna ekki sömu virkni. Ég kenni í gegnum fjarfundabúnaðinn Bláa hnöttinn (BigBlueButton) á Moodle og þetta virkar þannig að nemendur skrá sig inn á Moodle til þess að fara í kennslustundina. Ég sé hverjir eru mættir, gagnkvæm tjáskipti eru á milli mín og nemenda og ég get skrifað athugasemdir, eins og ég væri í kennslustofu að skrifa upp á töflu. Oftast byrja ég að fara yfir heimanámið, síðan fer ég í nýtt efni og ég er svo heppin með að hafa allar mínar kennslubækur rafrænar og í þessu vefumhverfi get ég skrifað athugasemdir inn í kennslubækurnar og nemendur fylgjast með og geta spurt,“ segir Elín og nefnir að hún taki einnig kennslustundirnar upp og visti á Moodle þannig að þeir nemendur sem af einhverjum orsökum geta ekki tekið þátt í kennslustundunum geti nálgast upptökur af þeim á Moodle.
Elín segist kenna eins og hún væri í skólastofu í VMA, að því leyti að allar kennslustundir í fjarnáminu hefjast á þeirri mínútu sem þær eiga að hefjast samkvæmt stundaskrá og síðan segist hún rétta úr sér í frímínútum, rétt eins og dags daglega í skólanum. „Það sem mér finnst erfiðast í þessu eru langvarandi setur, ég hef ekki yfir að ráða skrifborði sem hægt er að standa við. En einmitt þess vegna finnst mér mikilvægt að nýta frímínúturnar til þess að rétta úr mér,“ segir Elín og bætir við að síðan hún hóf þessa fjarkennslu hafi hún ákveðið að taka upp þann sið að klæðast sérstakri peysu í kennslunni – sem hún kallar Pascal-peysuna vegna svokallaðs Pascal þríhyrnings sem er framan á peysunni. Pascal þríhyrningurinn er svo kallaður vegna kerfis sem franski, sautjándu aldar stærðfræðingurinn Blaise Pascal lýsti. „Ég ákvað bara þegar þetta nýja kennslufyrirkomulag var tekið upp að ég vildi koma mér í ákveðna stemningu og fór því að klæðast þessari peysu og hef verið í henni síðan í hverri einustu kennslustund.“
Stærðfræðin sem Elín kennir nú í fjarnámi er af ýmsum toga – t.d. algebra, föll, annars stigs jöfnur, veldisvísar, rúmfræði, flatarmál, hornaföll, þríhyrningar o.fl. Hún segist ekki hafa rekist á veggi varðandi kennsluna sem orð sé á gerandi og hún gangi ljómandi vel, það sama megi segja um verkefnaskil og einnig hafi hún nú þegar lagt fyrir gagnvirkt próf í gegnum Moodle. Elín metur það svo að nemendur hafi verið að mæta ágætlega í tímana, í gærmorgun hafi hún til dæmis verið að kenna sautján nemenda hópi og af þeim hafi þrettán mætt í kennslustundina.
„Ég hef áður kennt í fjarkennslu í VMA en þetta er allt annar hlutur. Þetta er óneitanlega meiri vinna en í kennslustofunni en á móti kemur að hver nemandi hefur meira næði, truflunin er ekki sú sama og stundum er í kennslustofunni. Til að byrja með komu upp smá tæknivandamál en það tók skamman tíma að vinna bug á þeim. Almennt finnst mér þetta hafa gengið vel,“ segir Elín Björk Unnarsdóttir.