Hönnun heillar
Bjarki Rúnar Sigurðsson hefur lengi haft áhuga á hverskonar hönnun og því lá nokkuð beint við að fara á listnáms- og hönnunarbraut VMA. Hann ólst upp í Mosfellsbæ en fluttist norður yfir heiðar með fjölskyldu sinni árið 2007 og hún býr í kyrrðinni í Vaðlaheiðinni með prýðilegt útsýni til Akureyrar. Bjarki Rúnar var í grunnskóla á Hrafnagili og síðan lá leiðin á Eyrarlandsholtið.
Hann segir að mögulega séu einhver listræn gen í blóðinu, í það minnsta hafi Anna María systir hans útskrifast af textílkjörsviði listnámsbrautar VMA og grípi stundum í penslana og það sama geri móðir þeirra, Guðrún Ösp Sævarsdóttir. „Ég ímynda mér að myndlistaráhugi systur minnar og móður hafi ýtt undir að ég ákvað að fara þessa leið í náminu.“
Bjarki Rúnar er nú á lokasprettinum í náminu og útskrifast í desember nk. Hann vinnur nú að lokaverkefni sínu sem verður til sýnis ásamt öðrum lokaverkefnum útskritarnema í Ketilhúsinu síðar í þessum mánuði. Verkið segir hann að verði skúlptúr þar sem hann móti hreindýr úr grilltöngum og sé skúlptúrinn felldur inn í ljósmynd. Fróðlegt verður að sjá útkomuna.
Síðustu daga hefur akrílverk Bjarka Rúnars verið á vegg mót austurinngangi skólans. „Eiginlega er ég bara að æfa mig í þessu verki að mála fjölbreytt mótíf og steypa þeim saman í eitt verk. Ég hafði gert mér hugmynd um myndbygginguna en síðan þróaðist myndin bara í þessa átt,“ segir Bjarki Rúnar.
En hvert skyldi hann stefna að loknu náminu í VMA? Vinna til að byrja með, segir Bjarki Rúnar, og síðan segist hann íhuga að fara á lýðháskól í Danmörku áður en farið verði í frekara nám á sviði hönnunar, t.d. arkitektúr eða grafíska hönnun.