Fara í efni

Hljóð- og myndvinnsla í rafeindavirkjuninni

Í kennslustund nemenda á lokaönn í rafeindavirkjun
Í kennslustund nemenda á lokaönn í rafeindavirkjun

Einn af þeim áföngum sem nemendur á sjöundu og síðustu önn í námi sínu í rafeindavirkjun taka heitir Nettækni og miðlun. Þar eru, eins og nafnið gefur til kynna, netheimar skoðaðir frá ýmsum hliðum og nemendur fá innsýn í hljóð- og myndvinnslu. Ekki þarf að hafa um það mörg orð að með stöðugt betri hljóðnemum og myndavélum - auk þess aragrúa af forritum sem nú eru til fyrir hljóð- og myndvinnslu í tölvum - hafa stóraukist möguleikar fólks til þess að taka upp bæði hljóð og mynd í miklum og góðum gæðum og vinna síðan úr upptökunum í tölvum. Haukur Eiríksson, kennari í Nettækni og miðlun í rafeindavirkjuninni, segir að í þessum áfanga séu mörg áhugaverð verkefni unnin, í tveimur þeirra taki nemendur annars vegar upp hljóðdæmi og hins vegar myndbúta og vinni síðan með upptökurnar í tölvum. Haukur minnist þess að margar skemmtilegar hugmyndir hafi vaknað hjá nemendum í þessum efnum, jafnvel frumsamin tónlist, en einnig skemmtileg náttúruhljóð og margt fleira.

Þegar litið var í tíma hjá Hauki með nemendum á lokaönn í rafeindavirkjun var hljóðvinnsla einmitt viðfangsefni dagsins. Nemendur eru þessa dagana að vinna hljóðvinnsluverkefni og þau eru jafn fjölbreytt og nemendurnir eru margir. Dæmi um það er að Berglind Gunnarsdóttir fór sl. sunnudag í guðsþjónustu í Akureyrarkirkju og tók upp hljóðdæmi úr ræðu sóknarprestsins, séra Svavars Alfreðs Jónssonar, og hljóðdæmi úr söng Klassíska kórs Akureyrarkirkju, sem söng við guðsþjónustuna. Hér er Bergljót með vinkonu sinni, Ólöfu Ásdísi Kristjánsdóttur, í Akureyrarkirkju.

Eins og hér má sjá ljúka nemendur rafeindavirkjun á sjö önnum og mun hópur nemenda ljúka námi sínu með brautskráningu í desember nk. Lokaáfangi námsins er sveinspróf. Allir þeir nemendur sem velja að fara í rafeindavirkjun taka grunndeild rafiðna fyrstu fjórar annirnar en síðustu þrjár annirnar tekur við meiri sérhæfing í rafeindavirkjuninni.