Hárið og eftirréttir í brennidepli
10.10.2013
Nýjustu straumarnir í hártískunni kynntir.
Í tilefni af Viku símenntunar í iðnaði á Norðurlandi, sem Iðan fræðslusetur stendur fyrir, voru í gær haldin námskeið í VMA. Annars vegar var hárið aðalumfjöllunarefnið frá ýmsum hliðum og hins vegar var námskeið í gerð eftirrétta. Fleiri námskeið verða á vegum Iðunnar í VMA á kynningardegi skólans.
Í hársnyrtideild VMA var mikið um að vera í gær. Þar voru mætt módel sem unnið var með í því skyni að kynna
nýjustu straumana í klippingu og hárgreiðslu. Einnig var boðið upp á námskeið þar sem kynntar voru svokallaðar grænar
snyrtivörur. Umsjón með námskeiðinu höfðu Rán Reynisdóttir og Lárus Sölvason. Rán rekur sína eigin stofu og hefur
undanfarin ár unnið með grænar hársnyrtivörur. Lárus hefur tekið þátt í norrænu verkefni á vegum Nordisk Frisör
frá árinu 2005.
Í húsakynnum matvælabrautar bauð Ásgeir Þór Tómasson, bakarameistari og konditor, upp á námskeið í gerð
ljúffengra eftirrétta.
Hér má sjá nokkrar myndir sem voru teknar á áðurnefndum námskeiðum í gær.