Gagnleg og góð ferð til Þrándheims
"Þetta var mjög gagnleg og góð ferð. Ég lærði margt nýtt um mismunandi hönnun,“ segir Inga Líf Ingimarsdóttir, nemandi á textílsviði listnámsbrautar VMA, en hún fór dagana 18.-23. september sl. ásamt fimm skólasystrum sínum í VMA og kennurunum Sólveigu Þóru Jónsdóttur og Sveinu Björk Jóhannesdóttur til Þrándheims í Noregi þar sem þær kynntu sér m.a. nám í framhaldsskólanum Charlottenlund, sem er á margan hátt sambærilegur við VMA. Þessi heimsókn var liður í samstarfi skólanna sem hefur verið töluvert mikill undanfarin ár.
Í ferðinni kynnti hópurinn sér bæði textílkennsluna í Charlottenlund og einnig var farið í heimsóknir í nokkur fyrirtæki sem koma að hönnun á einn eða annan hátt. Inga Líf segir hafa verið afar skemmtilegt og áhugavert að bæði kynnast kennslunni í skólanum og ekki síður að fara í fyrirtækjaheimsóknirnar.
Inga Líf segist geta fullyrt eftir að hafa farið í þessa ferð að slíkar heimsóknir séu afar gagnlegar og víkki út sjónarhorn nemenda og gefi þeim nýjar og góðar hugmyndir. Sjálf segist hún útskrifast í desember nk. og nú þegar sé hún farin að huga að því að finna sér skóla erlendis, hún ætli að halda áfram námi á þessu sviði, helst horfi hún til búningahönnunar enda hafi hún bæði áhuga á leikhúsi og kvikmyndum.
Samstarf VMA og Charlottenlund mun halda áfram á næstunni því strax í næsta mánuði hyggjast textílnemendur og -kennarar frá Charlottenlund sækja VMA heim til þess að kynna sér námið hér.
Hér eru nokkrar myndir sem voru teknar í heimsókn VMA-nema og -kennara til Þrándheims.