Fara í efni

Allir nemendur í rafiðngreinum fengu spjaldtölvur að gjöf

Nemendur tóku við spjaldtölvunum með bros á vör.
Nemendur tóku við spjaldtölvunum með bros á vör.

Í dag voru öllum nemendum í rafiðnaðardeild VMA - þ.m.t. grunndeild rafiðna, rafvirkjun og rafeindavirkjun, færðar að gjöf spjaldtölvur frá Samtökum rafverktaka (SART) og Rafiðnaðarsambandi Íslands (RSÍ) fyrir hönd allra atvinnurekenda og launþega í rafiðnaði. Megintilgangur gefenda er að tryggja að nemendur geti nýtt sér það mikla úrval af kennsluefni sem er þegar í boði á rafrænu formi og stuðla að betri námsárangri og fjölgun nemenda í þessum greinum, en mikil vöntun er á rafiðnaðarmönnum á Íslandi. Allir nemendur í rafiðngreinum á landinu – samtals 800 nemendur - fá spjaldtölvur að gjöf á þessu hausti.

Rúnar Bachmann, formaður stjórnar Menntasjóðs rafiðnaðarins, segist vænta þess að með þessum stuðningi sækist nemum í rafiðngreinum námið betur, námsárangur þeirra verði betri og nemendum fjölgi, en talið er að nú vanti um tvö hundruð nýja starfsmenn með rafiðnaðarmenntun á vinnumarkaðinn á ári hverju til að viðhalda þörf markaðarins.

Óskar Ingi Sigurðsson, brautarstjóri rafiðngreina í VMA, er afar þakklátur gefendum fyrir að ráðast í þetta átak. „Þessi spjaldtölvuvæðing núna er afleiðing af nokkurra ára frumkvöðlastarfi Ísleifs Jakobssonar á fræðsluskrifstofu rafiðna. Hann byrjaði að safna námsefni og stofnaði vef sem heitir www.rafbok.is til að veita nemum gjaldfrjálsan aðgang að námsefni. Þetta verkefni óx hratt og með aðstoð Rafiðnaðarsambands Íslands hefur nú verið ráðinn starfsmaður til að sjá um að safna efni og halda utanum þetta starf. Nú er vefurinn að dekka næstum allt námsefni í grunndeild og stóran hluta af rafvirkjun. Og spjaldtölvuvæðingin er til að veita nemendum aðgengi að þessu efni án þess að þurfa að prenta út öll skjöl,“ segir Óskar Ingi.

Eins og Óskar nefnir hér að framan er nú þegar fyrir hendi námsgagnavefurinn www.rafbok.is sem nemendur geta skráð sig inn á og fengið aðgang að að því mikla úrvali af kennsluefni sem er í boði fyrir grunndeildir rafiðna og þurfa þeir þá ekki að kaupa þær námsbækur. Vefurinn var fjármagnaður af Menntasjóði rafiðnaðarins og nú hafa sem sagt Samtök rafverktaka og Rafiðnaðarsamband Íslands tekið annað stórt skref með því að gefa öllum nemendum í rafiðngreinum á landinu spjaldtölvur, til þess að tryggja aðgengi þeirra að því rafræna kennsluefni sem er nú þegar til staðar á vefnum.

Hilmar Friðjónsson var með myndavélina á lofti og tók þessar myndir af formlegri afhendingu spjaldtölvanna í VMA í gær.