Sumarið handan við hornið
Þó svo að þessa dagana sé fátt sem minni á sumarið segir almanakið okkur að það er komið, hófst með formlegum hætti í gær, á sumardaginn fyrsta. Skólaárið er því á síðustu metrunum, síðasti kennsludagur er nk. þriðjudag og síðan taka vorannarprófin við.
Heimasíðan hitti þrjár stúlkur frá Akureyri, Auði Þorsteinsdóttur, Sóleyju Kristínu Jónsdóttur og Guðrúnu Harðardóttur, sem allar hafa verið á almennri braut í vetur, í löngufrímínútum. Þær sögðust allar vera farnar að horfa vonaraugum til sumarsins, langur námsvetur að renna sitt skeið og sannarlega einnig langur vetur í veðurfarslegu tilliti. Þær stöllur sögðust allar vera ánægðar með þetta fyrsta ár sitt í VMA og áfangakerfið hafi hentað þeim vel. Auður sagðist vera búin að ákveða sig með framhaldið, hún ætlaði í bifvélavirkjun. Sóley Kristín og Guðrún sögðust hins vegar ekki vera búnar að ákveða endanlega hvaða leið þær myndu velja.
Að loknum prófum í maí liggur leið þeirra allra út á vinnumarkaðinn. Auður sagðist reyndar ekki vera búin að fá vinnu, en Sóley Kristín sagðist ætla að vinna hjá SAH Afurðum á Blönduósi, sem rekur þar sláturhús, en hún starfaði þar einnig sl. sumar. Sóley segist þekkja vel til á Blönduósi, enda hafi fjölskyldan búið þar lengi vel, en flutti til Akureyrar fyrir nokkrum árum. Guðrún mun vinna hjá Norðlenska á Akureyri í sumar, eins og sl. sumar.