Fara í efni

Fundað um forvarnamál

Frá forvarnafundinum í gær.
Frá forvarnafundinum í gær.

Áfengis- og fíkniefnaneysla ungmenna í framhaldsskólum var efni fundar í gær þar sem voru fulltrúar framhaldsskólanna á Akureyri, fulltrúar Barnaverndar Akureyrarbæjar, lögreglustjóri, yfirlögregluþjónn, sviðsstjóri samfélagssviðs Akureyrarbæjar og áfengis- og fíkniefnaráðgjafi og félagsmála- og forvarnarfulltrúar Rósenborgar.

Á fundinum komu fram áhyggjur fólks af stöðu mála hér á Akureyri. Ungmenni komist inn á skemmtistaði bæjarins þrátt fyrir að hafa ekki aldur til þess, æ fleiri sem ekki reykja sígarettur veipi og þá færist í vöxt að hassolía sé í veipvökvum. Fram komu áhyggjur af nemendum undir 18 ára aldri (lögaldri) í eftirlitslausum samkvæmum, bæði í foreldrahúsum og sölum sem þeir leigi til skemmtanahalds.

Könnun meðal grunnskólabarna og foreldra á  Akureyri leiðir í ljós að samvera unglinga og foreldra samkvæmt niðurstöðum „Ungt fólk“ hefur minnkað síðan 2016. Einnig bendir þessi könnun til þess að foreldrar á Akureyri verji skemmri tíma með börnum sínum en aðrir foreldrar á landinu. Á fundinum í gær kom mjög skýrt fram að foreldrar gegna lykilhlutverki í öllum forvörnum.

Stefnt er að frekari fundahöldum um þessi mál á næstunni í því skyni að allir taki höndum saman um að ná utan um þetta vandamál. Liður í því er fundur með foreldrum framhaldsskólanema sem verður boðað til fljótlega eftir áramót.