Íslandsfrumsýning á Tröllum á sunnudaginn - búið að bæta við fimmtu sýningunni!
Þá er komið að því! Leikfélag VMA frumsýnir nk. sunnudag leikritið Tröll í leikgerð leikstjórans Kolbrúnar Lilju Guðnadóttur og Jokku G. Birnudóttur. Leikgerðin var unnin út frá kvikmyndinni Trolls sem er vel þekkt, ekki síst fyrir tónlistina, nokkur laganna í sýningunni eru afar vel þekkt. Þetta er Íslandsfrumsýning á verkinu og því um heilmikinn viðburð að ræða í leiklistarlífinu á Akureyri.
Frumsýningin verður nk. sunnudag, 16. febrúar, kl. 14 í stóra salnum í Menningarhúsinu Hofi. Önnur sýning verður sama dag kl. 17. Annar sýningardagur verður sunnudagurinn 23. febrúar – þá verða sýningar einnig kl. 14 og 17. Upphaflega voru ákveðnar fjórar sýningar á verkinu en nú hefur, í ljósi mikils áhuga og rífandi sölu aðgöngumiða, fimmtu sýningunni verið bætt við sunnudaginn 8. mars kl. 14. Allar sýningarnar eru í sölu á tix.is og mak.is.
Egill Bjarni Friðjónsson brá sér á dögunum á æfingu á verkinu í Hofi og tók fjölda ljósmynda.
Í stórum dráttum eru Tröll um Poppý og Bragga sem fara til Böggabæjar til að bjarga vinum sínum úr klóm böggana, sem trúa því að ef þau borða tröllin verði þau hamingjusöm. Á leiðinni í Böggabæ hitta þau allskyns verur og lenda í ýmsum ævintýrum. Poppý er glaðleg og hress tröllaprinsessa sem elskar ekkert meira en að syngja og vera með vinum sínum. En Braggi er andstæðan við Poppý, hann er fúll og áhyggjufullur tröllastrákur sem er alltaf hræddur um að verða étinn af böggum. Þetta er því ævintýri í orðsins fyllstu merkinu og útlit sýningarinnar ber þess sannarlega merki. Sviðið í Hofi hefur breyst í tröllaveröld.
Í tveimur af burðarhlutverkum sýningarinnar eru Eyþór Daði Eyþórsson, sem er jafnframt formaður Þórdunu - skólafélags VMA, og Embla Björk Jónsdóttir, sem jafnframt er skemmtanastjóri í stjórn Þórdunu.
Embla Björk er 17 ára gömul. Hún er á fjórðu önn í grunndeild rafiðna og stefnir á nám í rafeindavirkjun að grunndeildinni lokinni. Embla segist hafa verið með leikhúsbakteríuna síðan hún man eftir sér og hafi alltaf haft gaman af söng og að leika. „Það má samt segja að ég hafi alveg dottið inn í þetta þegar ég fór á leiklistarnámskeið hjá leiklistarskóla LA þegar ég var krakki. Ég fór á öll námskeið sem voru í boði af því mér fannst þetta svo gaman. Svo fékk ég að stíga á stóra sviðið í Samkomuhúsinu árið 2013 þegar ég lék í verkinu Sek. Síðan þá hef ég tekið þátt í alls konar sýningum, til dæmis árshátíðarleikritum í grunnskólanum mínum og nokkrum uppsetningum hjá Freyvangsleikhúsinu. Í fyrra var allt á fullu hjá mér þar sem ég var bæði að leika Önnu í uppsetningu Freyvangsleikhússins á Línu Langsokki og í Bugsý Malón hér í VMA. Það sem dregur mig svona helst að leiklistinni er hvað það er ótrúlega skemmtilegt að fá að stíga inn í einhvern annan raunveruleika og gleyma sér í smá stund og svo skemmir athyglin sem maður fær út á það alls ekki fyrir. Þegar maður finnur þetta “rush” sem kemur yfir mann eftir vel heppnaða sýningu er ekki aftur snúið, það er svo æðisleg tilfinning. Þetta æfingaferli hefur verið rosaleg vinna en samt svo sjúklega skemmtilegt og gefandi. Ég er búin að kynnast svo mikið af æðislegu fólki og hef fundið nýja hlið á sjálfri mér sem leikara. Mér finnst eiginlega ótrúlegt hvað þetta hefur gengið vel. Fólk er að taka svo rosalega vel í þetta, enda er næstum uppselt á allar sýningarnar okkar. Nú erum við búin að bæta við þriðju sýningarhelginni svo það er um að gera að tryggja sér miða sem fyrst," segir Embla Björk Jónsdóttir.
Persónur og leikendur í sýningunni eru:
Rikka - Alexandra Guðný Berglind Haraldsdóttir
Grísli - Sveinn Brimar Jónsson
Poppý - Embla Björk Jónsdóttir
Braggi - Eyþór Daði Eyþórsson
Mamma drottning - María Björk Jónsdóttir
Birgitta - Sigíður Erla Ómarsdóttir
Bobbi Marley - Hrafnhildur Sunna Eyþórsdóttir
Kormákur - Úrsúla Nótt Siljudóttir
Dj plötusnúður - Vala Alvilde Berg
Kokkurinn og Ský - Örn Smári Jónsson.
Sem fyrr segir er Kolbrún Lilja Guðnadóttir leikstjóri og hún er handritshöfundur á móti Jokku B. Birnudóttur. Aðstoðarleikstjóri er Elísabeth Ása Eggerz, um raddþjálfun sér Særún Elma Jakobsdóttir, tónlistin er í höndun Hauks Sindra Karlssonar, danshöfundur er Þórgunnur Ása Kristjánsdóttir, búningahönnuðir eru Katrín Helga Ómarsdóttir og Svanbjörg Anna Sveinsdóttir og útlitshönnuðir eru Elín Gunnarsdóttir, Harpa Birgisdóttir og Jóhanna Þurý Eggerz.
Um hár og förðun sjá Jóhanna Þurý Eggerz, Karla Anna Karlsdóttir, Elín Gunnarsdóttir, Björg Elva Friðfinnsdóttir og Margrét Jóna Stefánsdóttir. Um tæknimálin sjá Anna Kristjana Helgadóttir, Hannes Haukur Sigurðsson og Tumi Snær Sigurðsson. Sviðsmyndina hafa unnið Halldór Birgir Eydal, Berglind Anna Erlendsdóttir, Ólafur Björgvin Jónsson, Sigrún Hekla Sigmundsdóttir, Anna Guðbjörg Andradóttir og Hrafn Hansbur. Umsjón með sviðsmynd hefur Aldís Lilja Sigurðardóttir.
Sýningastjórn er í höndum Vals Freys Sveinssonar, Ylfu Maríu Lárusdóttur og Önnu Lindar Logadóttur.