Frelsi til að virkja sköpunarkraftinn
Guðrún Brynjólfsdóttir er á lokasprettinum í námi sínu á myndlistarlínu listnáms- og hönnunarbrautar VMA. Hún útskrifast í maí nk. og hefur því að undanförnu unnið að lokaverkefni sínu í náminu, textílverki sem hún vann út frá ljóðinu “Með þér” sem Guðrún samdi fyrir nokkrum árum um yngri bróður sinn.
Þegar Guðrún hóf nám í VMA haustið 2014 lá leið hennar á félagsfræðibraut. Að ári loknu ákvað hún að skipta um námsbraut, segist ekki hafa fundið fjölina sína nægilega vel í því námi og ákvað að færa sig yfir í listnám. Hún rifjar upp að þegar hún hóf nám í VMA hafi hún sveiflast á milli þess að fara á félagsfræðibraut eða listnámsbraut. Þó svo að hún hafi valið að fara á félagsfræðibrautina hafi innst inni blundað í sér ríkari löngun til þess að fara í listnám. Af því lét hún verða haustið 2015 og sér ekki eftir því.
“Námið hefur verið frábært í alla staði, skemmtilegir samnemendur og frábærir kennarar. Á listnámsbrautinni hafa kennarar gefið nemendum svigrúm og virkjað þá til þess að gera hlutina að nokkru leyti á eigin forsendum, sem ég kann vel að meta. Kennararnir vilja að nemendur finni sinn stíl og virki sinn sköpunarkraft,” segir Guðrún.
Að loknu námi í VMA segist Guðrún ekki vera ráðin með framhaldið en líklega verði frekarar myndlistarnám ofan á.
Þessa dagana hangir uppi verk Guðrúnar “Óreiða” gegnt austurinngangi VMA. “Það má lýsa þessu verki sem safni hugsana sem ég vissi ekki hvernig ég ætti að koma frá mér. En myndlistin auðveldaði mér að gera það. Þegar ég byrjaði á verkinu var ég ekki með mótaða hugmynd um hvernig það myndi að lokum líta út. Ég byrjaði á skissu en hætti þegar mér fannst ég ekki vera á réttri braut – og byrjaði aftur frá grunni. Þetta var útkoman og ég er ágætlega sátt við hana,” segir Guðrún.