Fjórfaldur Evrópumeistari og setti heimsmet!
Sóley Margrét Jónsdóttir, sjúkraliðanemi á öðru ári í VMA og kraftlyftingakona í Kraftlyftingafélagi Akureyrar, varð í dag Evrópumeistari í +84 kg flokki stúlkna í kraftlyftingum á EM í Pilsen í Tékklandi. Ekki nóg með Evrópumeistaratitilinn, hún setti heimsmet í sínum flokki í hnébeygju, lyfti 265,5 kílóum. Hún átti ágæta lokatilraun í réttstöðulyftu við 217 kg sem hefði einnig fært henni heimsmet í samanlögðu, en það gekk ekki upp í dag.
Auk heimsmetsþyngdarinnar í hnébeygju lyfti Sóley Margrét í dag 155 kg í bekkpressu og 200 kg í réttstöðulyftu, samanlagt 620,5 kg. Hún vann til gullverðlauna í öllum þremur flokkum kraftlyftinga og að sjálfsögðu einnig í samanlögðu, sem sagt fjórfaldur Evrópumeistari í dag og setti þar að auki heimsmet.
Sóley Margrét þekkir vel að vera á hæsta þrepi á stórmótum, þetta er þriðja árið í röð sem hún fagnar Evrópumeistaratitli í sínum aldurs- og þyngdarflokki.
Hreint frábær árangur hjá Sóleyju Margréti, innilega til hamingju!