Fara í efni

Fjölsótt málþing um málefni ungs fólks: Samvera með foreldrum besta forvörnin

Pallborðið á málþinginu í Hofi í gær.
Pallborðið á málþinginu í Hofi í gær.

Málþing um málefni ungs fólks í Menningarhúsinu Hofi í gær með yfirskriftinni Unga fólkið okkar – hvert erum við að stefna? var afar vel sótt, líklega um tvö hundruð manns, og sköpuðust áhugaverðar og gagnlegar umræður. Að málþinginu stóðu framhaldsskólarnir á Akureyri, Lögreglan á Akureyri, FÉLAK – félagsmiðstöðvar Akureyrarbæjar og Akureyrarbær – samfélagssvið.

Framsögu á málþinginu höfðu Hildur Bettý Kristjánsdóttir, formaður frístundaráðs Akureyrar, Margrét Lilja Guðmundsdóttir, sérfræðingur frá Rannsókn og greiningu, Halla Bergþóra Björnsdóttir, lögreglustjóri á Akureyri og Jón Áki Jensson, geðlæknir á Sjúkrahúsinu á Akureyri. Að loknum framsöguerindum tóku við pallborðsumræður og að því loknu hafði Lögreglan á Akureyri til sýnis tæki og tól sem tengjast neyslu og starfsmenn Ungmennahúss og FÉLAK kynntu starfsemi sína.

Á málþinginu kom skýrt fram að mikill meirihluti ungmenna eru til mikillar fyrirmyndar og þrátt fyrir að oft sé rætt um áfengisneyslu ungmenna kom fram að hvergi í heiminum er unglingadrykkja minni en hér á landi. Hins vegar komu fram áhyggjur af veipi, ný könnun meðal framhaldsskólanema sýnir að 23% þeirra veipa daglega. Einnig kom fram að foreldrar hafa langmest áhrif á líðan ungmenna, þeim mun meiri sem samvera foreldra og barna þeirra er, þeim mun minni líkur eru á að þau leiðist út í neyslu. Samvera foreldra og barna er því, að mati þeirra sem um málið fjölluðu á málþinginu, ótvírætt lykilatriði í þessum efnum.

Í pallborðsumræðunum var m.a. rætt um forvarnir og hvernig Akureyrarbær og framhaldsskólarnir í bænum geti styrkt forvarnastarf sitt og komið á framfæri fræðslu til stuðnings við foreldra.